7-nji maýda ABŞ-nyň paýtagty Waşington şäherinde Türkmen-amerikan işewürlik hyzmatdaşlygy assosiasiýasynyň (TABCA) resmi açylyş dabarasy we onuň çäklerinde ilkinji işewürlik forumy geçirildi. Bu täze gurama iki ýurduň arasyndaky ykdysady gatnaşyklary täze derejä çykarmagy, telekeçileriň arasynda tejribe alyşmagy we täze bazarlary özleşdirmegi maksat edinýär. Çärä logistikadan başlap, IT ulgamyna çenli dürli ugurlarda işleýän 50-den gowrak kompaniýanyň wekilleri gatnaşdy.

Forumyň dowamynda esasy üns kiçi we orta telekeçiligiň (KOT) mümkinçiliklerine gönükdirildi. Gatnaşyjylar B2B (işewürlikden işewürlige) formatynda göni gepleşikleri geçirip, özara bähbitli taslamalaryň binýadyny tutdular. Elektron söwda, bilim we maslahat beriş hyzmatlary ýaly ugurlarda türkmen telekeçileriniň ABŞ-nyň işewürlik gurşawyna integrasiýasy barada gyzykly pikir alyşmalar boldy. Bu meýdança telekeçiler üçin diňe bir tanyşlyk däl, eýsem anyk hyzmatdaşlyk ýollaryny kesgitlemek üçin amatly pursat boldy.

Türkmenistanyň ilçihanasynyň wekilleri TABCA-nyň döredilmeginiň ähmiýetini belläp, bu assosiasiýanyň iki ýurduň işewürler dünýäsiniň arasynda ygtyýarly "köpri" boljakdygyny nygtadylar. Guramanyň işi Türkmenistanyň we ABŞ-nyň söwda dolanyşygyny artdyrmaga we täze maýa goýumlaryny çekmäge ýardam eder diýlip garaşylýar. Şeýle hem, häzirki zaman tehnologiýalaryny we dolandyryş usullaryny özleşdirmekde bu assosiasiýanyň uly orun tutjakdygy bellenildi.

Dabaranyň ahyrynda networking (işewürlik gatnaşyklaryny ýola goýmak) sessiýasy we sylaglama dabarasy boldy. Iki ýurduň arasyndaky söwda we işewürlik gatnaşyklaryny ösdürmäge uly goşant goşan iň işjeň telekeçiler ýörite sylaglara mynasyp boldular. TABCA-nyň işe başlamagy türkmen telekeçileriniň halkara giňişliginde, aýratyn-da Amerikanyň Birleşen Ştatlarynyň bazarynda öz orunlaryny tapmaklaryna uly ýardam berer.