Türkmenistanyň 2026-njy ýylda Garaşsyz Döwletleriň Arkalaşygynda başlyklyk etmeginiň Konsepsiýasy Birleşen Milletler Guramasynyň Baş Assambleýasynyň 80-nji sessiýasynyň resmi resminamasy hökmünde ykrar edildi. Bu möhüm resminama guramanyň gün tertibiniň 126-njy «Birleşen Milletler Guramasy bilen sebit we beýleki guramalaryň arasyndaky hyzmatdaşlyk» diýen bendine laýyklykda, A/80/722 indeksi bilen çap edildi we dünýä bileleşigine ýaýradyldy. Bu barada Türkmenistanyň BMG-niň ýanyndaky hemişelik wekilhanasy habar berdi.

Şeýle resminamanyň BMG-niň Baş Assambleýasynyň çäklerinde ýaýradylmagy Türkmenistanyň GDA giňişliginde netijeli, özara bähbitli we köptaraplaýyn hyzmatdaşlygy ösdürmek ugrunda yzygiderli alyp barýan parahatçylyk söýüjilikli daşary syýasatynyň nobatdaky dabaralanmasydyr. Bu waka paýtagtymyzyň sebitde we dünýäde hoşniýetli goňşuçylygyň, ynanyşmagyň, durnukly ösüşiň hem-de parahatçilikli utgaşyklygyň asylly ýörelgelerini öňe sürmekde alyp barýan işleriniň bütindünýä derejesinde ykrar edilýändigini aýdyň görkezýär.

Konsepsiýa Türkmenistanyň 2026-njy ýylda Garaşsyz Döwletleriň Arkalaşygynda başlyklyk etmeginiň ileri tutulýan strategik ugurlaryny doly şöhlelendirýär. Resminamada syýasy-diplomatik gepleşikleri has-da güýçlendirmek, söwda-ykdysady gatnaşyklary täze sepgitlere çykarmak, ulag-üstaşyr baglanyşygyny hem-de energetika hyzmatdaşlygyny giňeltmek wezipeleri bellenilipdir. Mundan başga-da, Arkalaşygyň agza döwletleriniň arasynda ynsanperwer gatnaşyklary we medeni alyş-çalyşlary ösdürmeklige hem aýratyn üns berilýär.

Halkara giňişliginde ýaýradylan bu resminamada parahatçylygy, howpsuzlygy we durnuklylygy saklamak, öňüni alyş diplomatiýasynyň netijeli gurallaryny kämilleşdirmek meseleleri aýratyn orun eýeleýär. Türkmenistan öz başlyklyk etjek ýylynda durnukly ösüşi üpjün etmek we Durnukly ösüş maksatlaryny (DÖM) üstünlikli durmuşa geçirmek ugrunda GDA bilen BMG-niň degişli düzümleriniň arasyndaky özara işjeň hereketleri täze hil derejesine götermegi maksat edinýär.