Hytaý Halk Respublikasy köp ýyllaryň dowamynda Türkmenistanyň iň iri söwda-ykdysady hyzmatdaşy bolup galýar. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Hytaýyň «CGTN» teleýaýlymyna beren interwýusynda bellemegine görä, 2007-nji ýyldan bäri iki ýurduň arasyndaky haryt dolanyşygy 20 esse artdy. Häzirki wagtda bu görkeziji her ýyl ortaça 9–10 milliard amerikan dollaryna barabar bolup, strategik hyzmatdaşlygyň durnukly ösýändigini görkezýär.

Iki döwletiň arasyndaky hyzmatdaşlyk diňe bir energetika pudagy bilen çäklenmän, eýsem aragatnaşyk, ýokary tehnologiýalar, dokma senagaty we agrosenagat ýaly möhüm ulgamlary hem öz içine alýar. Ulag we infrastruktura taslamalary bu gatnaşyklaryň ileri tutulýan ugurlarynyň biridir. Milli Liderimiz häzirki döwürde Türkmenistanyň demir ýollarynda hereket edýän wagonlaryň we lokomotiwleriň 90 göterimine golaýynyň Hytaýda öndürilendigini anyk mysal hökmünde getirdi.

Ulag ulgamyndaky gatnaşyklar täze logistik geçelgeleriň döredilmegi bilen has-da berkidilýär. 2014-nji ýylda Hytaý bilen Türkmenistany goňşy ýurtlaryň çäkleriniň üsti bilen birleşdirýän, uzynlygy 750 kilometrden gowrak bolan demir ýol ulgamynyň ulanmaga berilmegi sebitara söwdanyň ösmegine uly itergi berdi. Soňky ýyllarda türkmen bazarynda hytaý awtomobilleriniň, aýratyn-da döwrebap awtobuslaryň sanynyň ep-esli artmagy hem özara bähbitli söwdanyň aýdyň netijesidir.

Halk Maslahatynyň Başlygy geljekde Hazar deňziniň üsti bilen söwda kommunikasiýalaryny giňeltmek we Pars aýlagyna hem-de Hind ummanyna çykmak üçin ähli mümkinçilikleriň bardygyny nygtady. Türkmenistan bilen Hytaýyň logistik kuwwatyny birleşdirmek, Gündogar — Günbatar ugry boýunça üstaşyr geçelgeleriň netijeliligini ýokarlandyrmaga hyzmat eder. Bu bolsa diňe bir iki ýurt üçin däl, eýsem bütin Ýewraziýa giňişliginde ykdysady durnuklylygy üpjün etmekde möhüm ähmiýete eýedir.