Türkmenistanyň Ylymlar akademiýasynyň Halkara ylmy-tehnologiýa parkynda biotehnologik ulgamy köptaraply ösdürmegiň ykdysady bähbitlerine bagyşlanan ylmy-amaly maslahat geçirildi. Bu çärä ýurduň ylmy edaralarynyň öňdebaryjy wekilleri, şol sanda ylymlar kandidatlygyna dalaşgärler we ýaş alymlar gatnaşdylar. Maslahatyň esasy wezipesi Tehnoparkyň ylmyň gazananlaryny önümçilige ornaşdyrmak we amaly netijeleri gazanmak ugrundaky işjeňligine baha bermekden ybarat boldy.

Halkara hyzmatdaşlygy ösdürmegiň çäklerinde maslahata gatnaşyjylar Hytaýyň Ylymlar akademiýasynyň Mikrobiologiýa instituty bilen ýola goýlan gatnaşyklaryň amaly taraplaryny ara alyp maslahatlaşdylar. Iki taraplaýyn Ähtnamanyň çäklerinde taraplar daşky gurşawy goramak we oba hojalygy ýaly ugurlarda düýpli barlaglary amala aşyrýarlar. Mejlisiň dowamynda çykyş eden hytaýly professorlar duzlulyga çydamly mikromisetleriň esasynda taýýarlanylan innowasion biopreparatlaryň önümçilik mümkinçiliklerini görkezdiler.

Ekologik durnuklylygy üpjün etmek we çölleşmä garşy göreşmek boýunça ýerine ýetirilen işler maslahatyň aýratyn ugruna öwrüldi. Tehnoparkyň hünärmenleri Garagumuň süýşýän gumlaryny ýerli sianobakteriýalaryň kömegi bilen berkitmegiň we toprakda gumusyň toplanmagyny üpjün etmegiň täze usulyny hödürlediler. Senagat ekologiýasy pudagy üçin bolsa nebit dökülmelerinden zyýan çeken meýdançalary ýerli mikroflora arkaly köp fazaly bioremediasiýa usuly bilen arassalamagyň tehnologiýasy tanyşdyryldy.

Maldarçylyk we derman senagaty ulgamynda hem importyň ornuny tutýan täze önümleriň hem-de tehnologiýalaryň işlenip düzülendigi baradaky maglumatlar aýlyňlaşdyryldy. Hususan-da, ahalteke bedewleri üçin ýöriteleşdirilen iým garyndylary we guşçulyk toplumlary üçin mör-möjeklerden ýokary hilli protein almagyň usullary özleşdirildi. Şeýle hem ýerli dermanlyk ösümliklerden mikrokapsulirlenen derman serişdelerini we üzümden hem-de ýerarmydyndan antıoksidant häsiýetli inulin, resweratrol dermanlyk maddalaryny bölüp almagyň galyndysyz tehnologiýasy ýola goýuldy.