2026-njy ýylyň iýul aýynda Şanhaýyň ösen tehnologiýalar zolagy bolan Žanszýanda umumy meýdany 5000 inedördül metre deň bolan döwrebap synag we okuw meýdançasy öz işine başlar. Bu taslama dürli brendleriň we öndürijileriň robotlaryny bir ýerde jemläp, olaryň programma üpjünçiligini hem-de fiziki hereketlerini bilelikde kämilleşdirmek üçin niýetlenendir. Täze merkeziň döredilmegi emeli aň ulgamynda halkara ülňülere laýyk gelýän täze tapgyry emele getirer.

Taslamanyň baş maksady robot tehnikalaryny önümçilik, saglygy goraýyş we durmuş hyzmatlary ulgamlaryna has çalt ornaşdyrmakdan ybaratdyr. Munuň üçin bolsa dünýä tejribesinde ilkinji gezek ägirt uly tejribe-sanly maglumatlar binýady emele getiriler. Okuw merkeziniň ilkinji tapgyryna Hytaýyň iň öňdebaryjy on sany tehnologiýa kärhanasyndan ýüzden gowrak ynsanpisint robot kabul edildi. Olar adamyň berýän dilden buýruklaryny kompýuter arkaly kabul edip, tabşyryklary garaşsyz ýerine ýetirmegi öwrenerler.

Tälim maksatnamasynyň çäklerinde androidler ilki bilen 45 sany esasy amaly endigi, ýagny ýüki galdyrmak, daşamak we belli bir ýere goýmak ýaly hereketleri awtomatiki derejä ýetirmelidirler. Mundan başga-da, okuw meýilnamasyna otaglary arassalamak, önümleri tekjelere düzmek ýaly 10 sany çylşyrymly ugur girizildi. Bu amallaryň takyklygyny gazanmak maksady bilen, hünärmenler we alymlar tarapyndan her bir hereketiň ýerine ýetirilişine günde 600 gezege çenli gözegçilik ediler.

Merkeziň baş direktory Sýu Biniň aýtmagyna görä, bu merkez maglumatlaryň uly göwrümli çalşygyny we olaryň bilelikde ulanylmagyny üpjün etmek üçin meýdança bolar. Her gün emele getiriljek 50 müň töwereklerindäki maglumat nokady ýylda 10 million birbaga deň bolan sanly maglumatlar goruny döreder. Öndürijiler öz robotlaryny kesgitli kärlere çalt uýgunlaşdyrmak maksady bilen bu umumy binýatdan mugt peýdalanyp bilerler, bu bolsa öz gezeginde global robot senagatyna uly itergi berer.