«Rockstar Games» kompaniýasy tarapyndan taýýarlanýan köpden bäri garaşylýan «Grand Theft Auto VI» oýnunyň şahsy kompýuterler (ŞK) üçin niýetlenen görnüşiniň 2027-nji ýylyň birinji çärýeginde çykarylmagy meýilleşdirilýär. «GamesBeat» neşiriniň abroýly insaýderlere salgylanyp berýän maglumatlaryna görä, bu wersiýa konsollar üçin bellenilen relizden soň örän gysga wagtyň içinde oýun söýüjilere gowuşar.

Oýnuň «PlayStation 5» we «Xbox Series X/S» ýaly döwrebap konsollardaky resmi relizi 2026-njy ýylyň 19-njy noýabryna meýilleşdirildi. Eger insaýderleriň täze maglumatlary tassyklansa, ŞK wersiýasy geýmerlere öňki taslamalara garanyňda has tiz elýeterli bolar. Meselem, tapgyryň öňki «GTA V» oýny konsollarda 2013-nji ýylyň güýzünde çykan bolsa, onuň kompýuter wersiýasy diňe bir ýyl ýedi aý geçenden soň peýda bolupdy. Hünärmenleriň pikiriçe, studio auditoryýany çalt özüne çekmek we satyş görkezijilerini ýokary saklamak üçin bu gezek relizi tizleşdirmegi makul bilýär.

Kompýuter wersiýasynyň tizräk çykmagyna ulanyjylaryň öz döredýän modlary we rol oýnalýan (RP) serwerleri hem goşmaça itergi berýär. 2023-nji ýylda «Rockstar» kompaniýasy «GTA V» üçin meşhur «FiveM» platformasyny döreden «Cfx.re» toparyny satyn alypdy. Şeýle köpçülikleýin serwerleriň esasan kompýuter amatlylygyna esaslanýandygyny nazara alsaň, täze oýnuň ŞK-da tizräk elýeterli bolmagy kompaniýa üçin strategik ähmiýete eýedir.

Mundan başga-da, ýaýran maglumatlara görä, «GTA VI» oýnunda ilkinji gezek doly derejeli awtosport toplumy peýda bolar. Oýunçylar üçin ýörite awtodromlarda klassiki halka görnüşli ýaryşlaryň, ýolsuz ýerdäki off-roud bäsleşikleriniň, motokrossyň we köçe ýaryşlarynyň hem elýeterli boljakdygyna garaşylýar.