Oýun sanawy
Serdar Berdimuhamedow Dünýä türkmenleriniň ynsanprwer birleşiginiň maslahatyna gatnşyjylary gutlady
13 Sen. 11:23Dünýä türkmenleriniň ynsanperwer birleşiginiň hormatly agzalary!
Eziz watandaşlar, mähriban doganlarymyz!
Sizi Halkara parahatçylyk we ynanyşmak ýylynda Dünýä türkmenleriniň ynsanperwer birleşiginiň XXVI maslahatynyň öz işine başlamagy bilen tüýs ýürekden gutlaýaryn. Ösüşiň, berkararlygyň we rowaçlygyň ak ýolunda belent maksatlara ruhlandyrýan milli baýramymyz bolan Türkmenistanyň Garaşsyzlyk gününiň öňüsyrasynda geçirilýän bu maslahatyň agzybirligimizi, jebisligimizi hem-de doganlyk gatnaşyklarymyzy has-da pugtalandyrmakda ähmiýetiniň örän uly boljakdygyna berk ynanýaryn.
Garaşsyzlyk we Bitaraplyk biziň asyrlaryň dowamynda kemala gelen milli döwletliligimiziň hem-de buýsanjymyzyň gözbaşydyr, abraý-mertebämiziň dünýä dolan belentligidir. Berkarar döwletiň täze eýýamynyň Galkynyşy döwründe biz Garaşsyzlygymyzyň we hemişelik Bitaraplygymyzyň beýik işlere galkyndyrýan güýji, watansöýüjiligimiz, döredijilik hyjuwymyz, zähmet joşgunymyz bilen ajaýyp geljegimizi gurýarys. Şoňa görä-de, Halkara parahatçylyk we ynanyşmak ýylynyň milli we halkara ähmiýetli wakalaryny örän möhüm şanly senelerimiz — Garaşsyzlygymyzyň 34 ýyllygy hem-de hemişelik Bitaraplygymyzyň 30 ýyllygy bilen baglanyşdyryp, bu mukaddes gymmatlyklarymyza bolan sarpamyzy we söýgimizi Ýer ýüzünde giňden dabaralandyrýarys. Bularyň ählisi eziz Watanymyzyň Garaşsyzlygyny hem-de Birleşen Milletler Guramasynyň Baş Assambleýasy tarapyndan üç gezek ykrar edilen hemişelik Bitaraplygyny beýikligiň, mukaddesligiň täze derejesine götermek bilen, ählimizde egsilmez buýsanç duýgularyny döredýär, parahatçylyk söýüjilik, dostluk, ynsanperwerlik baradaky ýörelgelerimizi hem-de taglymatlarymyzy dünýä ýaýýar.
Hormatly adamlar!
Türkmen halkynyň Milli Lideri, Türkmenistanyň Halk Maslahatynyň Başlygy, Dünýä türkmenleriniň ynsanperwer birleşiginiň Prezidenti Gahryman Arkadagymyzyň nusgalyk işleri netijesinde Garaşsyzlygymyzyň we hemişelik Bitaraplygymyzyň sütünlerini berkitmekde ägirt uly işler amala aşyrylyp, eziz Watanymyz syýasy, ykdysady, medeni-ynsanperwer ugurlarda ynamly ösýän döwletleriň biri hökmünde ykrar edilip, parahatçylygyň, dostlugyň, bagtyýarlygyň ýurduna öwrüldi. Berkarar döwletiň täze eýýamynyň Galkynyşy döwründe döwletimiziň binýadyny pugtalandyrmak babatda gazanylanlara daýanyp, ýurdumyzy gülledip ösdürmegiň, mähriban halkymyzyň abadan durmuşda ýaşamagynyň bähbidine milli maksatnamalarymyzy, giň gerimli özgertmelerimizi üstünlikli durmuşa geçirip, Watanymyzyň durnukly ösüşini üpjün edýäris. Döwlet ähmiýetli Arkadag şäheriniň gurluşygynyň ikinji tapgyryny, sebitlerimizde häzirki zaman obalaryny, şäherçeleri, täze önümçilikleri, ýokary tizlikli awtomobil ýollaryny gurup, döwletimizi täze sepgitlere tarap aýgytly gadamlar bilen öňe alyp barýarys.
Milli Liderimiziň umumadamzat ähmiýetli başlangyçlaryny, döredijilikli syýasatymyzy, müňýyllyklardan gözbaş alýan parahatçylyk söýüjilik, dostluk, bitaraplyk, ynsanperwerlik ýörelgelerimizi Ýer ýüzünde dabaralandyrmak, eziz Watanymyzyň köpugurly ösüşlerine goşant goşmak, doganlyk gatnaşyklary ösdürmek babatda Dünýä türkmenleriniň ynsanperwer birleşiginiň we bu guramanyň watansöýüjiligi baýdak edinen agzalarynyň alyp barýan işleri bizi örän guwandyrýar.
Eziz watandaşlar!
Birleşen Milletler Guramasy tarapyndan üç gezek ykrar edilen hemişelik Bitaraplygymyzyň esasy ýörelgelerinden ugur alyp, dünýä döwletleri, halkara guramalar bilen köpugurly gatnaşyklary ýola goýup, eziz Watanymyzyň halkara giňişlikdäki ornuny yzygiderli pugtalandyrýarys. Dünýä bileleşigi bu gün ýurdumyzyň halkara gatnaşyklar ulgamyndaky belent abraýyna uly sarpa goýýar we öňe sürýän başlangyçlarymyzy işjeň goldaýar. 2025-nji ýylyň 21-nji martynda Birleşen Milletler Guramasynyň Baş Assambleýasynyň 79-njy sessiýasynyň 61-nji plenar mejlisinde kabul edilen «Türkmenistanyň hemişelik Bitaraplygy» atly Kararnama biziň müňýyllyklardan gözbaş alýan bitaraplyk taglymatymyza, ählumumy parahatçylygy we ösüşi üpjün etmäge gönükdirilen ynsanperwer syýasatymyza, parahatçylyk, ynanyşmak däplerini rowaçlandyrmak ugrundaky başlangyçlarymyza berlen ýokary bahadyr. Şu ýylyň awgustynda «Awaza» milli syýahatçylyk zolagynda ýokary derejede geçirilen Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahaty hem-de onuň çäklerinde kabul edilen resminamalar ýurdumyzyň halkara abraýynyň belentdigini ýene-de bir gezek dünýä ýaýdy. Bu taryhy wakalar biziň mähriban halkymyzda hem-de Zeminiň çar künjeginde ýaşaýan eziz doganlarymyzda çäksiz buýsanç duýgularyny döredýär.
Dünýä türkmenleriniň ynsanperwer birleşiginiň hormatly agzalary!
Eziz watandaşlar, mähriban doganlarymyz!
Sizi Dünýä türkmenleriniň ynsanperwer birleşiginiň XXVI maslahatynyň öz işine başlamagy bilen ýene-de bir gezek tüýs ýürekden gutlaýaryn. Size berk jan saglyk, abadan we bagtyýar durmuş, berkarar Watanymyzyň şan-şöhratyny mundan beýläk-de belende götermek, dost-doganlyk gatnaşyklarymyzy pugtalandyrmak ugrunda alyp barýan asylly işleriňizde uly üstünlikleri arzuw edýärin.
Türkmenistanyň Prezidenti
Serdar BERDIMUHAMEDOW.
Şeýle hem okanyň
Türkiýe Respublikasynyň Aşgabatdaky Ilçisi türkmen metbugat wekilleri bilen duşuşyp, ikitaraplaýyn hyzmatdaşlygyň geljekki ugurlaryny maslahatlaşdy
24 Okt. 13:042026-njy ýylyň 24-nji oktýabrynda Türkiýe Respublikasynyň Türkmenistandaky Adatdan daşary we Doly ygtyýarly Ilçisi jenap Şener Jebeji Ilçihananyň resmi rezidensiýasynda türkmen köpçülikleýin habar beriş serişdeleriniň wekilleri bilen tanyşlyk ertirlik naharyny gurady. Duşuşyk dostlukly we işjeň ýagdaýda geçirilip, iki ýurduň arasyndaky köpýyllyk hyzmatdaşlygy, medeni-ynsanperwer baglanyşyklary hem-de syýahatçylyk ugry boýunça gazanylan sepgitleri jemlemäge we täze bilelikdäki taslamalary maslahatlaşmaga giň mümkinçilik döretdi.
Dostlukly duşuşygyň dowamynda Ilçi Şener Jebeji metbugatyň ýurtlaryň we halklaryň arasyndaky köprüleri berkidýän hem-de dostlukly gatnaşyklary geljege ugrukdyrýan iň güýçli sütünleriň biridigini aýratyn belledi. Şol bir wagtda ol TRT-niň Aşgabatdaky wekilhanasynyň köp ýyllaryň dowamynda alyp barýan işleriniň we «TRT Awaz» teleýaýlymynyň bütin türki dünýäsine ugrukdyrylan alyp berişleriniň bu ugurda nusgaly mysaldygyny nygtady. Ilçi Türkmenistanyň döwlet we hususy habar beriş serişdeleri bilen ýakyn hyzmatdaşlygy mundan beýläk hem işjeňleşdirmäge açykdyklaryny beýan etdi.
Duşuşykda soňky döwürde Türkmenistanyň habar beriş serişdeleriniň wekilleri üçin Türkiýe Respublikasynda guralan netijeli saparlar we kabul ediş maksatnamalary barada giňişleýin maglumat berildi. Hususan-da, 2026-njy ýylyň 28-nji sentýabry – 4-nji oktýabry aralygynda Türkiýäni Ösdürmek Agentligi (TGA) tarapyndan Gaziantepde we Şanlyurfada türkmenistanly iki žurnalist kabul edildi. Olar 30-njy sentýabr – 4-nji oktýabr aralygynda Şanlyurfa howa menzilinde geçirilen «TEKNOFEST» awiasiýa, kosmos we tehnologiýalar halkara festiwalynyň çärelerine ýakyndan gatnaşdylar.
Mundan başga-da, TGA hem-de «Türk howa ýollary» (THY) kompaniýasynyň Aşgabat wekilhanasynyň hyzmatdaşlygynda, Türkiýäniň Ilçihanasynyň goldamagynda 2026-njy ýylyň 10–14-nji oktýabry aralygynda 11 adamdan ibarat türkmen wekiliýeti (10 metbugat wekili we ýerli işgär) Çanakkale we Balykesir welaýatlaryna sapar etdi. Žurnalistler saparyň çäklerinde Zeýtun ýagy muzeýinde, Kaz daglarynda, Assos hem-da Troýa gadymy şäherlerinde, Troýa muzeýinde, Gelibolu taryhy zolagynda we Çanakkala şehitleriniň ýadygärliginde bolup, sebitiň baý taryhy-medeni mirasy bilen tanyşdylar. Umumylykda, 2023–2026-njy ýyllarda geçirilen 14 sany kabul ediş maksatnamasynyň çäklerinde Türkmenistandan jemi 84 adam Türkiýäniň dürli sebitlerinde myhmançylykda boldy.
Iki ýurduň arasyndaky syýahatçylyk ugry bоýunça görkezijiler hem çalt depginler bilen artýar. Maglumatlara görä, 2026-njy ýylyň ýanwar–awgust aýlarynda Türkmenistandan Türkiýä gelen myhmanlaryň sany 151 887 adama ýetip, bu görkeziji 2025-nji ýylyň degişli döwri bilen deňeşdirilende 20,46 göterim artdy. Türkiýäniň syýahatçylyk pudagy hem global derejede uly üstünlikleri gazanýar: 2017-nji ýylda dünýäde iň köp syýahatçy kabul eden ýurtlaryň arasynda 8-nji orunda duran Türkiýe 2024-nji ýylda 4-nji orna geçdi. Ýurt 2025-nji ýylda 64 million myhmany kabul edip, 65,2 milliard dollar girdeji bilen rekord goýan bolsa, 2026-njy ýylda 68 milliard dollar girdejä ýetmegi maksat edinýär.
Duşuşygyň soňunda Ilçi Şener Jebeji bu tanyşlyk ertirlik naharynyň geçirilen saparlary jemlemek we geljekde bilelikde ädilip bilinjek täze ädimleri maslahatlaşmak üçin örän gymmatly mümkinçilik bolandygyny tassyklady. Ol Ilçihananyň metbugat wekillerinden gelip gowuşjak ähli hyzmatdaşlyk tekliplerini seljermäge taýýardygyy hem-da bilelikdäki taslamalary amala aşyrmakdan razy boljakdygyny bilidirdi.
Şeýle hem diplomatik wekilçiligiň ýolbaşçysy Türkiýe bilen Türkmenistanyň arasyndaky gatnaşyklary täze ýokary derejä çykarjak möhüm ýokary derejeli sammitlere we ýubileý çärelerine yzygiderli taýýarlyk görülýändigini belledi. Türkiýe Respublikasynyň Prezidenti Rejep Taýyp Erdoganyň, Türkmenistanyň Prezidenti Serdar Berdimuhamedowyň we Türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň berk syýasy erk-islegine daýanyp, Ilçihana ikitaraplaýyn birleşikde we iki doganlyk halkyň bähbidine hyzmatdaşlygy ähli ugurlar boýunça ösdürmek ugrundaky işlerini durnukly dowam etdirer.
Blitz