Maýa Kulyýewa adyndaky Türkmen milli konserwatoriýasynda «Kompozisiýa we gurallama» kafedrasynyň ýörite hepdeliginiň çäklerinde saz medeniýetiniň ösüşine bagyşlanan ylmy-amaly çäreler toplumy başlandy. Hepdeligiň dabaraly açylyşynda kafedranyň taryhy ýoly, ýetilen belent sebitler we geljekki meýilnamalar barada giňişleýin maglumatlar berildi. Bu çäre ýurduň sazçylyk sungatynyň ylmy binýadyny berkitmekde möhüm ädim boldy.

Maslahatyň esasy bölegi «Kompozisiýa hünäri boýunça okuw derslerini okatmagyň käbir aýratynlyklary» diýen mowzuga bagyşlandy. Onda professional sazandalary taýýarlamagyň döwrebap usullary we milli ýörelgeleri sazlaşykly utgaşdyrmagyň ýollary seljerildi. Çäräniň dowamynda Türkmenistanyň sungatda at gazanan işgäri Suhan Tüýliýew özüniň täze ylmy işini — «Türkmen sazynyň nazaryýeti» atly monografiýasyny tanyşdyryp, onuň sazşynaslyk ylmyndaky ähmiýetine ünsi çekdi.

Şeýle hem duşuşykda meşhur kompozitorlar we halypa mugallymlar çykyş edip, özleriniň döredijilik tejribeleri bilen paýlaşdylar. Olar türkmen saz sungatynyň düýbüni tutan Nury Halmämmedow, Daňatar Öwezow we Aman Kulyýew ýaly beýik şahsyýetler baradaky ýatlamalaryny beýan etdiler. Halypalaryň durmuş ýoly we döredijilik mekdebi baradaky bu gürrüňler ýaş kompozitorlar üçin uly mekdep boldy.

Medeni çäräniň dowamynda türkmen sazynyň altyn hazynasyna giren eserleriň arhiw ýazgylary diňlenildi. Bu bolsa talyplara we maslahata gatnaşyjylara saz eserleriniň gurluşyny we ruhy mazmunyny has çuňňur duýmaga mümkinçilik berdi. Konserwatoriýada geçirilýän bu ylmy-döredijilik hepdeligi milli saz mirasyny gorap saklamak we ony täze nesillere ýetirmek ugrunda alnyp barylýan işleriň aýdyň netijesidir.