Saud Arabystanynyň Futbol federasiýasy (SAFF) öz milli ýygyndysynyň gatnaşmagyndaky Dünýä çempionaty — 2026-nyň oýunlaryna janköýerler üçin mugt giriş peteklerini paýlamak boýunça ýörite akssiýany ýola goýdy. Bu baradaky resmi habar Saud Arabystanynyň Amerikanyň Birleşen Ştatlaryndaky ilçihanasynyň maglumat ulgamlarynda çap edildi.

Bu ykdysady we guramaçylyk ädimi, Halkara futbol federasiýasynyň (FIFA) transkontinental turnire geljek daşary ýurtly janköýerleriň sanynyň garaşylýandan az bolaýmak ähtimallygy we stadionyň doldurylmagy baradaky wehimlerine jogap hökmünde kabul edildi. Hökümet maksatnamasyna görä, mugt petekler ilkinji nobatda häzirki wagtda ABŞ-nyň çäginde okaýan, ylmy işler bilen meşgullanýan ýa-da wagtlaýyn ýaşaýan Saud Arabystanynyň raýatlaryna hödürlenilýär. Federasiýanyň habarnamasynda: «Dünýä çempionatynyň başlanmagyna sanlyja günler galdy. Sizden diňe stadiona gelip goldamak, bizden bolsa petekleri üpjün etmek» diýlip bellenilýär.

Mundialyň toparlaýyn tapgyrynda Saud Arabystanynyň milli ýygyndysy «H» toparynda ýaryşar we indiki tapgyra çykmak ugrunda Urugwaýyň, Ispaniýanyň hem-de Kabo-Werdeniň güýçli toparlaryna garşy meýdança çykar.

Futbol boýunça 2026-njy ýylyň Dünýä çempionaty 11-nji iýun — 19-njy iýul aralygynda durnukly dowam eder. Duşuşyklar taryhda ilkinji gezek bir wagtyň özünde üç sany guramaçy ýurtda — ABŞ-da, Kanadada we Meksikada geçiriler. Ýaryşyň oýunlaryna goýlan resmi petekleriň nyrhy saýlanyp alynýan ýere we oýnuň derejesine baglylykda 100 dollardan 6370 dollara çenli üýtgeýär. Şeýle-de, öňümizdäki çempionat dünýä futbolynyň taryhynda 48 sany milli ýygyndynyň gatnaşmagynda guraljak ilkinji giňeldilen global ýaryş bolar.