Oýun sanawy
Russiýaly inženerler kosmosda agyrlyk güýjüni döretmegiň usulyny işläp düzdüler
«Roskosmos» gurluşynyň düzümine girýän «Energiýa» raketa-kosmos korporasiýasy kosmos giňişliginde emeli agyrlyk güýjüni döretmäge mümkinçilik berýän täze ulgam bilen çykyş etdi. Bu täzeçillik eýýäm patent aldy.
Täze ulgam birnäçe moduly öz içine alýar. Merkezi bölegi statiki we aýlanýan elementlerden ybarat bolup, olaryň arasynda howa geçirmeýän hereketli bogun ýerleşýär. Bu merkezden dört sany ýaşaýyş üçin niýetlenen modul radial görnüşde ýerleşdirilýär. Her modul özbaşdak energiýa we durmuş üpjünçilik ulgamy bilen enjamlaşdyrylandyr.
Stansiýa aýlanyp başlasa, merkezden daşarky güýç — ýagny merkezden gaçyryjy güýç — peýda bolup, agyrlyk güýjüne meňzeş şertleri döredýär. Aýlanyş tizligi arkaly 0,5g derejesine çenli güýji döretmek mümkin, bu bolsa ýer ýüzündäki agyrlyk güýjüniň ýarysyna barabar.
Inženerler bu ulgamda ýokary ygtybarlylygy üpjün etdiler: hatda bir bölegi işden çyksa-da, stansiýa öz işini dowam etdirip bilýär. Bu täze tehnologiýa, uzak möhletli orbitadaky ýaşaýyş bazalaryny döretmekde we Aý bilen Marsa bolan geljekki uçuşlara taýýarlyk işlerinde möhüm orun eýelär.
Şeýle hem okanyň
Iň köp görülen
Türkmenistan «Bitewi saglyk» taslamasynyň çäklerinde sebitleýin hyzmatdaşlygy güýçlendirýär
29-31-nji oktýabr aralygynda Täjigistanyň paýtagty Duşenbede «Pandemiýalaryň öňüni almak, azyk howpsuzlygyny hem-de ekoulgamlaryň sagdynlygyny üpjün etmek üçin Merkezi Aziýada “Bitewi saglyk”» atly taslamanyň ilkinji sebitleýin maslahaty we Sebitleýin utgaşdyryş geňeşiniň mejlisi geçirildi. Bu barada Türkmenistanyň Oba hojalyk ministrliginiň Döwlet weterinariýa gullugy habar berdi.
Maslahata Merkezi Aziýa ýurtlarynyň hökümetleriniň we degişli ministrlikleriniň wekilleri, şeýle hem halkara guramalar we ösüş boýunça hyzmatdaşlar gatnaşdylar. Türkmenistanyň wekiliýeti oba hojalyk, saglygy goraýyş we derman senagaty, daşky gurşawy goramak, şeýle hem maliýe we ykdysadyýet ministrlikleriniň hünärmenlerinden ybarat boldy.
Umumy mejlisde Türkmenistanyň Oba hojalyk ministrliginiň adyndan Döwlet weterinariýa gullugynyň halkara we ylmy aragatnaşyklar bölüminiň müdiri Arslan Soltanmyradow çykyş etdi. Ol Türkmenistanyň Prezidentiniň ýolbaşçylygynda durnukly ösüş ugrunyň yzygiderli durmuşa geçirilýändigini, ilatyň saglygyna, haýwanat dünýäsiniň goralmagyna hem-de ekologiýa howpsuzlygyna aýratyn üns berilýändigini belledi.
A.Soltanmyradowyň bellemegine görä, «Bitewi saglyk» konsepsiýasy azyk howpsuzlygyny üpjün etmäge, mallardan adamlara geçýän keselleriň (zoonozlaryň) öňüni almaga we weterinariýa-sanitariýa abadançylygyny pugtalandyrmaga gönükdirilendir. Ol Türkmenistanyň bu ugurda edaralaryň we sebit ýurtlarynyň arasyndaky hyzmatdaşlyga işjeň gatnaşýandygyny nygtady.
Maslahat, ýurtlaryň arasynda tejribe alyşmak, bilelikdäki çäreleri utgaşdyrmak hem-de sebitleýin hyzmatdaşlygy ösdürmek üçin meýdança öwrüldi. Gatnaşyjylar Sebitleýin utgaşdyryş geňeşiniň işiniň ýola goýluşyny we taslamany ýerine ýetirmäge goldaw berjek tehniki iş toparlaryny döretmek meselelerini ara alyp maslahatlaşdylar.
Forumyň gatnaşyjylary Türkmenistanyň «Bitewi saglyk» ulgamynyň ösdürilmegine goşan möhüm goşandyny bellediler we Merkezi Aziýa ýurtlarynyň bilelikdäki tagallalarynyň dünýä derejesinde biologik we azyk howpsuzlygyny üpjün etmäge mynasyp goşant goşjagyna ynam bildirdiler.
Şeýle hem okanyň
Blitz