Paýtagtymyzyň «Aşgabat» stadionynda ýurduň maliýe-bank edaralarynyň işgärleriniň arasynda ýeňil atletika boýunça «Bank-2026» kubogy ugrundaky bäsleşikler geçirildi. Bu sport çäresine Türkmenistanyň bäş sany iri bankynyň — «Türkmenistan», «Türkmenbaşy», «Daýhanbank», «Senagat» we «Halkbank» banklarynyň saýlama toparlary gatnaşyp, özara ukyp-başarnyklaryny görkezdiler. Guramaçylyk işlerini «Halkbank» paýdarlar täjirçilik banky amala aşyrdy.

Bäsleşigiň maksatnamasy ýeňil atletikanyň iň gyzykly ugurlaryny öz içine aldy. Türgenler 100 metr aralyga ylgamakda, 4x100 metr aralyga estafeta ýaryşynda we uzynlyga bökmekde bäsleşdiler. Alty türgenden ybarat bolan her bir topar umumy toparlaýyn hasapda ýokary netije görkezmek üçin uly durnuklylyk we taýýarlyk derejesini nümayiş etdirdi.

Ýaryşyň umumy netijeleri boýunça «Senagat» paýdarlar täjirçilik bankynyň türgenleri iň ýokary görkezijileri hasaba alyp, turniriň ýeňijisi boldular. «Daýhanbank» döwlet täjirçilik bankynyň wekilleri tutanýerli bäsleşigiň netijesinde ikinji orny eýeläp, kümüş medallara mynasyp boldular. Baýrakly üçünji orny bolsa meýdançanyň eýeleri bolan «Halkbank» PTB-niň topary eýeledi.

Dabaraly ýagdaýda geçen sylaglama çäresinde öňe saýlanan toparlara we türgenlere ýörite hormat hatlary, dürli derejeli medallar hem-de gymmat bahaly sowgatlar gowşuryldy. Bu sport bäsleşigi bank ulgamynyň işgärleriniň arasynda sagdyn durmuş ýörelgesini wagyz etmekde we pudagara dostlukly gatnaşyklary berkitmekde möhüm ähmiýete eýe boldy.