2026-njy ýylyň 7-nji awgustynda zähmet ýoly Türkmenistan bilen berk baglanyşykly bolan sowet we rus futbol tälimçisi Waleriý Nepomnýaşiý 83 ýaşyny doldurdy. 1943-nji ýylda Russiýanyň Slawgorod şäherinde dünýä inen hünärmen sport ýoluna Aşgabatda başlady. Ol Türkmen döwlet uniwersitetiniň ýygyndysynda çykyş edip, 1969-njy ýylda bu ýokary okuw mekdebini tamamlady. Аlan agyr şikesi sebäpli ol 25 ýaşynda futbolçylyk karýerasyny tamamlamaly boldy we özüni dolulygyna tälimçilik kärine bagyşlady.

Nepomnýaşiýniň tälimçilik ussatlygy Aşgabatda kemala geldi. Ol 1970–1978 we 1983–1988-nji ýyllarda Türkmenistanyň Sport baradaky komitetiniň futbol mekdebinde uly tälimçi, 1979-njy we 1982–1983-nji ýyllarda bolsa «Kolhozçy» toparynyň baş tälimçisi bolup işledi. Şol ýyllarda toplanan amaly tejribe hünärmene halkara derejä çykmaga zemin döretdi. 1988-nji ýylda Moskwada hünärini kämilleşdirenden soň, ol Kamerunyň milli ýygyndysynyň baş tälimçisi wezipesine bellenildi.

Tälimçiniň karýerasyndaky iň uly üstünlik 1990-njy ýylda Italiýada geçirilen Dünýä çempionatynda gazanyldy. Onuň ýolbaşçylygyndaky Kamerun topary turniriň açylyş duşuşygynda Fransua Omam-Biýikiň golunyň saýasynda Diego Maradonaly Dünýä çempiony Argentinany 1:0 hasabynda ýeňdi. Netijede, Kamerun Dünýä çempionatynyň çärýek finalyna çenli baryp ýeten ilkinji Afrika ýygyndysy hökmünde futbol taryhyna altyn harplar bilen ýazyldy.

Kamerundaky uly üstünlikden soň Waleriý Nepomnýaşiý Türkiýäniň, Günorta Koreýanyň, Hytaýyň, Ýaponiýanyň, Özbegistanyň hem-de Russiýanyň «Tom», «Baltika» we SSKA ýaly klublarynda tälimçi we geňeşçi wezipelerinde zähmet çekdi. Şeýle-de bolsa, belli hünärmen öz söhbetdeşliklerinde iň ýyly ýatlamalarynyň hut uly futbola badalga alnan ýeri bolan Türkmenistan bilen baglanyşyklydygyny yzygiderli nygtap gelýär.