Astanada geçirilýän Sebit ekologiýa sammitiniň çäklerinde Türkmenistanyň Prezidenti Serdar Berdimuhamedow «RES 2026 EXPO» atly «ýaşyl» we durnukly tehnologiýalaryň halkara sergisine baryp gördi. Bu çäre sebit ýurtlarynyň Baştutanlarynyň gatnaşmagynda guralyp, daşky gurşawy goramak we ekologik taýdan arassa energetikany ösdürmek boýunça iň täze çözgütleriň görkezilýän meýdançasyna öwrüldi.

Serginiň dowamynda Merkezi Aziýa döwletleriniň we Azerbaýjanyň milli pawilýonlaryna aýratyn orun berildi. Ýokary derejeli myhmanlara sebit ýurtlarynyň tebigy serişdeleri netijeli dolandyrmak we energetika ulgamyny döwrebaplaşdyrmak boýunça öňe sürýän ileri tutulýan ugurlary tanyşdyryldy. Bu başlangyçlar sebitde durnukly ösüşi üpjün etmekde we ekoulgamlaryň bitewüligini saklamakda möhüm ähmiýete eýedir.

Ekspozisiýalarda Araly halas etmek we suw serişdelerini gorap saklamak ýaly möhüm meseleleri çözmegiň täze usullaryna esasy üns berildi. Mundan başga-da, döwlet Baştutanlaryna hususy pudagyň ýeten sepgitleri hem görkezildi. Kompaniýalar galyndylary gaýtadan işlemek we senagat önümçiliginde ekologiýa kadalaryny berjaý etmek boýunça özleriniň iň döwrebap innowasion taslamalaryny hödürlediler.

«RES 2026 EXPO» sergisi dünýäniň 30 döwletinden 240-dan gowrak gatnaşyjyny we halkara hyzmatdaşlary bir ýere jemledi. 120-den gowrak pawilýonda durnukly ösüşe gönükdirilen tehnologiýalar şöhlelenýär. Bu halkara forum diňe bir täze tehnologiýalary görkezmek bilen çäklenmän, eýsem, ekologiýa meselelerini bilelikde çözmek üçin tejribe alyşmak meýdançasy hökmünde hem hyzmat edýär.