Oýun sanawy
Moskwada rekord derejeli gar: tebigy hadysa 55 ýyllyk görkezijini täzeledi
28 Aprel. 12:18Russiýanyň paýtagtynda soňky günlerde bolup geçen gar ýagynlary taryhy rekordlaryň täzelenmegine sebäp boldy. «Fobos» howa merkeziniň hünärmenleriniň maglumatlaryna görä, şäherdäki gar örtüginiň beýikligi eýýäm 12 santimetre ýetdi. Bu görkeziji soňky ýarym asyrdan gowrak wagtyň dowamynda, has takygy 55 ýyllap dowam eden rekordyň yzda galandygyny aňladýar.
Howa menziliniň baş hünärmeni Mihail Leusyň tassyklamagyna görä, bu dereje aprel aýynyň ahyry üçin adatdan daşary ýagdaý hasaplanýar. Şol bir wagtyň özünde, beýleki bir hünärmen Ýewgeniý Tişkowes paýtagta düşen umumy ygalyň mukdarynyň has ýokarydygyny, ýagny düýn 21 santimetr ygal düşendigini belledi. Şeýle äpet gar ýagynlary iň soňky gezek mundan 144 ýyl ozal, ýagny 1880-nji ýylda hasaba alnypdyr.
Şeýle hem okanyň
Aýlag ýurtlarynyň alty çäginde ýeke-täk syýahatçylyk wizasy girizilýär
09 Sen. 08:44Aýlagdaky arap döwletleriniň hyzmatdaşlyk geňeşine (GCC) girýän alty ýurt — Bahreýn, Kuweýt, Oman, Saud Arabystany, BAE we Katar daşary ýurtly syýahatçylar üçin birmeňzeş «GCC Grand Tourist Visa» ulgamyny çykarmaga taýýarlanýarlar. «Khaleej Times» neşiriniň habar berşi ýaly, täze wiza resminamasy syýahatçylara sebitiň ähli döwletlerine aýratyn wiza almazdan päsgelsiz girmäge mümkinçilik döreder.
Synag tapgyrynyň 2026-njy ýylyň soňky çärýeginde başlamagyna garaşylýan bu elektron wizanyň möhleti 30 günden 90 güne çenli bolup, bahasynyň 100–150 dollar aralygynda boljakdygy bellenilýär. Köpçülikleýin habar serişdelerinde «Arap Şengeni» diýlip hem atlandyrylýan bu taslama Aýlag sebitinde syýahatçylygy ösdürmekde hem-de döwletara hyzmatdaşlygy berkitmekde uly ädim bolar.
Blitz