Ženewada geçiriljek «Christie’s» auksionynyň maý aýyndaky söwdalarynda dünýäniň iň täsin gymmat bahaly daşlarynyň biri bolan «The Ocean Dream» (Umman arzuwy) göwheri hödürlener. Bu gymmat bahaly daş özüniň üýtgeşik gök-ýaşyl öwüşgini bilen tapawutlanyp, dünýäniň iň seýrek reňkli göwherleriniň biri hasaplanýar. Almazlaryň arasynda şeýle reňk tebigatda örän seýrek duş gelýär, bu bolsa ony kolleksionerler üçin aýratyn gymmatly edýär.

Agramy 5,50 karata deň bolan bu göwher Amerika gemologiýa instituty (GIA) tarapyndan bu reňk derejesindäki iň uly daş hökmünde ykrar edildi. Üçburçluk görnüşinde ýonulan «The Ocean Dream» 1990-njy ýyllarda Merkezi Afrika Respublikasyndan tapylan 11,70 karatlyk tebigy almaz kristalyndan işlenip alyndy. Ol özüniň fiziki aýratynlyklary boýunça almazlaryň örän seýrek duş gelýän «Ia» görnüşine degişlidir.

Bu göwheriň taryhy ähmiýeti hem örän ýokarydyr. Ol 2003-nji ýylda Waşingtonyň Smitson institutynda geçirilen meşhur «Splendor of Diamonds» sergisinde dünýäniň iň seýrek sekiz göwheriniň biri hökmünde görkezildi. Şol wagtda bu daş halkara bilermenleriniň we gymmat bahaly daşlara gyzyklanma bildirýänleriň ünsüni özüne çekip, dünýä derejesindäki abraýyna eýe boldy.

«The Ocean Dream» göwheri 2026-njy ýylyň 13-nji maýynda Ženewanyň meşhur «Four Seasons Hotel des Bergues» myhmanhanasynda geçiriljek auksionda täze eýesini tapar. Bilermenleriň çaklamalaryna görä, bu täsin göwheriň bahasy 8,9 milliondan 12,7 million dollara çenli ýetip biler. Şeýle seýrek reňkli we uly göwheriň satuwa çykarylmagy dünýäniň gymmat bahaly şaý-sepler bazarynda ýylyň iň esasy wakalarynyň biri bolar.