Oýun sanawy
«Tebigaty gorap – geljegi gurýarys» atly ekofestiwal 4-nji synp okuwçylary üçin guraldy
Şu gün 140-njy umumybilim berýän mekdepde «Tebigaty gorap – geljegi gurýarys» ady bilen geçirilen ekologiki çäre uly üstünlik bilen tamamlandy. Bu fesiwal Oguz han adyndaky Inžener-tehnologiýalar uniwersitetiniň Biotehnologiýa we ekologiýa fakultetiniň mugallymlarynyň hem-de talyplarynyň başlangyjy bilen geçirildi.
Çäräniň maksady ýaş nesliň arasynda ekologiýa babatda düşünjäni ösdürmek we tebigata jogapkärli çemeleşmegi endik hökmünde ornaşdyrmak boldy. Dördünji synp okuwçylaryna niýetlenen maksatnama maglumat taýdan baý we interaktiw görnüşde guraldy.
Esasy üns Durnukly ösüş maksatlaryna (DÖM) gönükdirildi. Uniwersitetiň wekilleri dünýäde ýüze çykýan ekologiki meseleler bilen adamlaryň gündelik durmuşyndaky gatnaşyklar baradaky düşünjeleri açyp berdiler. Okuwçylar tebigatyň dürlüligini goramak, suw serişdelerini tygşytly ulanmak we howanyň üýtgemegine uýgunlaşmak bilen baglanyşykly meseleler bilen tanyşdylar.
Çäräniň dowamynda okuwçylaryň düşünjelerini çuňlaşdyrmak maksady bilen ekologiki oýunlar, sorag-jogap bäsleşikleri we tematik krosswordlar geçirildi. Ýeňijilere we işjeň gatnaşyjylara sowgatlar hem-de hormat hatlary gowşuryldy.
Festiwalda uniwersitet talyplarynyň taýýarlan okuw serişdeleri we görkezme maketleri hem görkezildi. Bu gollanmalar tebigy hadysalary düşünmekde okuwçylara kömek edýär we ýokary okuw derejesinde taýýarlanan gural hökmünde aýratyn ähmiýete eýedir.
Bu çäre ýokary okuw mekdebi bilen orta mekdebiň arasyndaky hyzmatdaşlygyň üstünlikli mysaly bolup, ýurdumyzda ekologiýa düşünjesini ýaş nesillerde ösdürmäge gönükdirilen işleriň hatarynda möhüm orun eýeleýär.
Şeýle hem okanyň
Iň köp görülen
Türkmenistanyň bank ulgamynyň zenan işgärleriniň arasynda döredijilik bäsleşigi geçirildi
Türkmenistanyň Jemgyýetçilik guramalarynyň merkezinde ýurdumyzyň bank pudagynda zähmet çekýän zenanlaryň arasynda döredijilik bäsleşiginiň jemleýji tapgyry geçirildi. Oňa welaýatlaryň hem-de şäherleriň saýlama tapgyrlarynda öňe çykan ýeňijiler gatnaşdy.
Bäsleşigiň ilkinji tapgyrynda gatnaşyjylar Türkmenistanyň bank ulgamyndaky ösüşler, gazanylan sepgitler hem-de 2011–2030-njy ýyllar üçin bank ulgamyny ösdürmegiň Döwlet maksatnamasy esasynda alnyp barylýan işler barada gürrüň berdiler.
Ikinji tapgyrda gatnaşyjylar aýdym, dessan ýa-da goşgular bilen çykyş etdiler. Jemleýji tapgyrda bolsa olar dabaraly saçak taýýarlap, milli naharlaryň taýýarlanylyşyny görkezdiler.
Netijeler boýunça:
-
üçünji orun — Ahal, Lebap welaýatlaryndan we Arkadag şäherinden gelen gatnaşyjylara;
-
ikinji orun — Balkan welaýatyndan we Aşgabat şäherinden gatnaşyjylara;
-
birinji orun — Mary welaýatynyň wekillerine;
-
Baş baýrak — Daşoguz welaýatynyň gatnaşygyna berildi.
Ýeňijiler we baýrak alanlar hormat hatlary hem-de gymmatly sowgatlar bilen sylaglandy.
Bäsleşigiň dabaraly bölegi estrada ýerine ýetirijileriniň aýdym-sazly çykyşlary bilen tamamlandy.
Bäsleşik Türkmenistanyň Merkezi banky, Türkmenistanyň zenanlar birleşiginiň Merkezi geňeşi we Türkmenistanyň kärdeşler arkalaşyklarynyň milli merkezi tarapyndan guraldy. Çäre Parahatçylyk we ynam ýylyna, Türkmenistanyň Garaşsyzlygynyň 34 ýyllygyna, hemişelik bitaraplygyň 30 ýyllygyna, şeýle hem milli manadyň dolanyşyga girizilmeginiň 32 ýyllygyna bagyşlandy.
Şeýle hem okanyň
Blitz