Malaýziýanyň Hökümet baştutany Anwar Ibrahim resmi sapar bilen Türkmenistanyň paýtagtna geldi. Aşgabadyň Halkara howa menzilinde belent mertebeli myhmany ýurduň resmi wekilleri garşyladylar. Döwlet Baştutanlarynyň gatnaşmagynda geçiriljek bu duşuşyk iki ýurduň arasyndaky syýasy hem-de ykdysady gatnaşyklary täze tapgyra çykarmaga gönükdirilendir.

Ýokary derejede geçiriljek gepleşikleriň netijeleri boýunça ikitaraplaýyn resminamalaryň we ylalaşyklaryň uly toplumyna gol çekilmegine garaşylýar. Taraplaryň energetika pudagynda, üstaşyr ulag ulgamynda, innowasion tehnologiýalarda we agrar sektorda täze taslamalary amala aşyrmaga uly gyzyklanma bildirýändigi mälim edildi. Şeýle hem medeni-ynsanperwer, ylym we bilim ulgamlaryndaky gatnaşyklary çuňlaşdyrmak gepleşikleriň esasy ugurlarynyň biri bolar.

Malaýziýanyň iri «Petronas» kompaniýasynyň Türkmenistanyň çäklerinde ençeme ýyllaryň dowamynda amala aşyrýan maýa goýum taslamalary bu hyzmatdaşlygyň durnuklylygyny görkezýär. Taraplar Hazar deňziniň degişli böleginde gazanylan köpýyllyk hünär tejribesine daýanyp, uglewodorod serişdelerini gaýtadan işlemek, nebithimiýa önümçiligini döretmek hem-de önümçilige «ýaşyl» tehnologiýalary ornaşdyrmak meselelerini ara alyp maslahatlaşarlar.

Ýurtlaryň arasyndaky gatnaşyklaryň işjeňleşmeginde Türkmenistanyň Prezidenti Serdar Berdimuhamedowyň Kuala-Lumpur şäherine amala aşyran resmi sapary möhüm itergi boldy. Mundan başga-da, Aşgabat we Kuala-Lumpur halkara giňişliginde, esasan hem Birleşen Milletler Guramasynyň çäklerinde dünýä ähmiýetli başlangyçlary özara goldamak arkaly ysnyşykly hyzmatdaşlyk edýärler.