Türkmenistanyň Ministrler Kabinetiniň Başlygynyň orunbasary N. Atagulyýewiň ýolbaşçylygyndaky wekiliýet Azerbaýjana saparynyň çäklerinde Baku halkara deňiz portuna baryp gördi. Bu ýerde Türkmenistanyň wise-premýeri bilen «Azerbaýjan Demir Ýollar» (ADY) ÝGP-niň başlygy Rowşan Rüstemowyň arasynda işewürlik duşuşygy guraldy. Türkmen wekiliýetine Baku portunyň tehniki mümkinçilikleri, sanly ulgam arkaly demir ýol gatnawlary bilen utgaşdyrylyşy we sebitdäki üstaşyr ähmiýeti barada giňişleýin maglumat berildi.

Ikitarapeýyn duşuşygyň dowamynda Türkmenbaşy halkara deňiz portunyň düzümini kämilleşdirmek, hususan-da, deňiz düýbüni çuňlaşdyrmak işlerini amala aşyrmak arkaly uly göwrümli gämileri kabul etmek meseleleri ara alnyp maslahatlaşyldy. Portlaryň maddy-enjamlaýyn binýadynyň döwrebaplaşdyrylmagy Hazar deňzi arkaly amala aşyrylýan ýük daşamalarynyň möçberini artdyrmak üçin täze mümkinçilikleri açýar.

Taraplar iki ýurduň portlarynyň we demir ýol ulgamlarynyň arasynda maglumat alyşmagyň sanlylaşdyrylmagyna aýratyn üns berdiler. Sanly ulgamyň ornaşdyrylmagy ýükleriň resmileşdirilmegini çaltlandyrmaga we ulag amallarynyň netijeliligini ýokarlandyrmaga ýardam eder. Bu bolsa sebitara ulag geçelgeleriniň halkara bazaryndaky bäsdeşlige ukyplylygyny berkitmäge gönükdirilendir.

Gepleşikleriň ahyrynda multimodal ýük daşamalaryny ösdürmek we Gündogar-Günbatar-Gündogar ugry boýunça ýük akymyny işjeňleşdirmek baradaky meselelere seredildi. Iki ýurduň ulag düzümleriniň utgaşykly işi Aziýa we Ýewropa yklymlarynyň arasyndaky söwda gatnaşyklarynyň durnukly ösmegine uly goşant goşar diýlip garaşylýar.