Şu gün bütin Türkmenistanda täzelenişiň, ruhy galkynyşyň we tebigatyň oýanyşynyň nyşany bolan Milli bahar baýramy — Halkara Nowruz güni dabaraly bellenilip geçilýär. Bu şanly baýram mynasybetli Türkmenistanyň Prezidenti Serdar Berdimuhamedow mähriban halkymyza we ähli watandaşlarymyza gyzgyn gutlaglaryny ýollady. Döwlet Baştutany öz gutlagynda Nowruzyň köpasyrlyk taryhy kökleriniň we baý medeni mirasymyzyň dowamatlylygynyň ähmiýetini aýratyn nygtady.

Prezident öz gutlagynda: «"Garaşsyz, baky Bitarap Türkmenistan — bedew batly at-myradyň mekany" ýylynda dabarasy uludan tutulýan bu baýramda ýerine ýetiriljek joşgunly aýdym-sazlaryň, edebi-çeper çykyşlaryň we milli gymmatlyklaryň sergileriniň ata-babalarymyzdan miras galan medeni hazynamyzy dünýä ýüzünde wagyz etmekde uly ähmiýeti bolar» diýip belledi. Gutlagda Nowruz baýramynyň akyldar şahyrlarymyzyň eserlerinde hem öz mynasyp beýanyny tapandygy ýatlanyldy.

Döwlet Baştutanynyň belleýşi ýaly, Gündogar halklarynyň ýaşaýyş-durmuşynda aýratyn orny eýeleýän Nowruz agzybirligiň, parahatçylygyň we dost-doganlygyň baýramydyr. Bu gadymy senenamada jemlenen hoşniýetlilik we ynsanperwerlik ýörelgeleri häzirki wagtda bütin adamzat üçin umumy gymmatlyga öwrüldi. Bahar paslynyň gelmegi bilen türkmen tebigatynyň has-da gözelleşýändigi we zähmetsöýer daýhanlarymyzyň täze bol hasylyň düýbüni tutýandyklary hem gutlagda öz beýanyny tapdy.

Gutlagynyň ahyrynda Türkmenistanyň Prezidenti ähli watandaşlarymyza berk jan saglyk, parahat we bagtyýar durmuş arzuw etdi. «Goý, Nowruzyň kalby joşdurýan owazlary agzybirligiň, dost-doganlygyň waspy bolup, hemişe ýaňlanyp dursun!» diýen arzuwly sözler bilen döwlet Baştutany halkymyzyň agzybirligine we ýurdumyzyň mundan beýläk-de gülläp ösmegine bolan ynamyny beýan etdi.