Aşgabatdaky Mukamlar köşgünde Türkmenistanda guralýan Azerbaýjan Respublikasynyň Medeniýet günleriniň dabaraly açylyş dabarasy geçirildi. Bu giň gerimli çäre iki goňşy we doganlyk halkyň arasyndaky taryhy garyndaşlyk gatnaşyklaryny, dostlukly we hoşniýetli goňşuçylyk gatnaşyklaryny has-da pugtalandyrmaga gönükdirilendir. Medeni çäräniň açylyşyna medeniýet we sungat işgärleri, jemgyýetçilik guramalarynyň hem-de diplomatik wekilhanalaryň ýolbaşçylary gatnaşdy.

TDH agentliginiň habar berşi ýaly, baýramçylyk konsertinde iki ýurduň sungat ussatlarynyň joşgunly çykyşlaryna giň orun berildi. Tomaşaçylar Azerbaýjanyň Fikret Amirow adyndaky Döwlet milli saz gurallary orkestriniň, Gara Garaýew adyndaky Döwlet kamera orkestriniň ýokary derejeli çykyşlaryny, şeýle-de döwlet tans toparynyň deprekçileriniň ýerine ýetiren milli tanslaryny uly el çarpyşmalar bilen garşy aldylar. Konsert maksatnamasyna aýratyn öwüşgin çaýan «Galkynyş» toparynyň ýerine ýetiren “Küştdepdi” tansy azerbaýjanly sungat ussatlarynyň aýdym-sazlary bilen ajaýyp sazlaşygy döretdi.

Medeniýet günleriniň çäklerinde diňe bir aýdym-saz däl, eýsem şekillendiriş we kino sungatyna hem degişli çäreler guraldy. Beýik Saparmyrat Türkmenbaşy adyndaky Türkmenistanyň Şekillendiriş sungaty muzeýinde «Azerbaýjanyň milli mirasynyň merjeni» atly sergi açyldy. Bu ýerde Azerbaýjanyň Milli haly muzeýiniň ýygyndysyndan XIX asyrdan häzirki döwre çenli taryhy öz içine alýan çitme we kakma usulyndaky dokma önümleri, zergärçilik we metal bezeg şaýlary, milli lybaslar görkezilýär. Şonuň bilen birlikde, paýtagtymyzyň «Aşgabat» kinoteatrynda azerbaýjan kinematografiýaçylarynyň çeper filmleriniň görkezilişi başlandy.