ÝHHG-niň Aşgabatdaky merkezinde habar beriş serişdeleriniň wekilleri üçin maglumatlary dogry seljermek, internet gurşawynda nädogry maglumatlardan goranmak we jogapkärli sanly mazmun döretmek endiklerini ösdürmäge gönükdirilen okuw maslahaty guruldy. Iki günüň dowamynda geçirilen bu çärä ýurdumyzyň welaýat neşirleriniň, internet portallarynyň we telewideniýäniň işgärleri gatnaşdylar. Okuw maslahaty milli habar beriş serişdeleriniň işini döwrebaplaşdyrmak we hünärmenleriň hünär derejesini ýokarlandyrmak babatda möhüm ädim boldy.

Okuw maksatnamasy Gazagystanyň «MediaNet» halkara žurnalistika merkeziniň bilermeni Adil Jalilowyň gatnaşmagynda, ýerli tälimçiler tarapyndan taýýarlanyldy we durmuşa geçirildi. Bilelikdäki işleriň netijesinde düzülen maksatnama faktçeking, ýagny maglumatlary barlamak metodlaryny, döwrebap medianyň tehnologik gurallaryny we ÝUNESKO-nyň etiki kadalaryny öz içine aldy. Şeýle hem gatnaşyjylara emeli aňyň we neýroulgamlaryň kömegi bilen gyzykly materiallary taýýarlamagyň hem-de sanly howpsuzlygy üpjün etmegiň ýollary görkezildi.

ÝHHG-niň Aşgabatdaky merkezi Türkmenistanyň adam hukuklary boýunça Hereketleriň milli meýilnamasynda göz öňünde tutulan köpçülikleýin habar beriş serişdeleriniň erkinligi we ilatyň media sowatlylygyny ýokarlandyrmak baradaky wezipeleriň ýerine ýetirilmegine ulgamlaýyn esasda goldaw berip gelýär. Bu ugurdaky hyzmatdaşlyk ýerli žurnalistleriň halkara tejribeden peýdalanmaklaryna giň mümkinçilikleri döredýär. Şeýle taslamalar media gurşawynda professional çemeleşmeleriň berkemegine ýardam edýär.

Häzirki wagtda ýurdumyzda dürli diňleýjiler köpçüligine tälim bermäge ukyply bolan 20 sany ýerli hünärmenden ybarat tälimçiler topary döredildi. Geçirilen çäre bu toparyň agzalary tarapyndan guralan nobatdaky okuwlaryň biri boldy. Mundan ozal guralan amaly okuwlara žurnalistler, döwлет gullukçylary, bloggerler we talyplar gatnaşyp, olaryň umumy sany ýüzden gowrak adama ýetdi. Bu bolsa ýurtda media sowatlylygynyň geriminiň barha giňeýändigini subut edýär.