Türkmenistanyň zenanlar wekiliýetiniň Hytaý Halk Respublikasyna eden saparynyň çäklerinde, Gurbanguly Berdimuhamedow adyndaky howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa birnäçe möhüm duşuşyklary geçirdi.

Ilkinji duşuşyk Hytaý Halk Respublikasynyň bilim ministri Hua Jingpin bilen boldy. Oguljahan Atabaýewa mähirli kabul edendikleri üçin minnetdarlyk bildirip, bilim ulgamynyň Türkmenistanyň ösüşi üçin möhüm ugur bolup durýandygyny belledi. Ol gaznanyň çagalara goldaw bermäge gönükdirilen işini tanyşdyrdy we iş ugurlarynyň giňeldilmeginiň meýilleşdirilýändigini, şol sanda mümkinçilikleri çäkli çagalaryň bilimine üns berilýändigini aýtdy.

Hytaýyň bilim ministri bu başlangyçlary doly goldaýandygyny we inklýuziw bilim ulgamynda hyzmatdaşlyga taýýardygyny aýtdy.

Soňra O. Atabaýewa Hytaýyň Saglygy goraýyş döwlet komitetiniň başlygynyň orunbasary Zeng Isin bilen duşuşdy. Duşuşykda lukmanlaryň hünär derejesini ýokarlandyrmak we çagalaryň onkologiýa, genetiki keselleriniň bejergisi boýunça Hytaýyň tejribesini öwrenmek meseleleri ara alnyp maslahatlaşyldy. Hytaý tarapy bu ugurlarda hyzmatdaşlyga, tejribe alyşmagyna hem-de bilelikdäki ylmy barlaglara taýýardygyny nygtady.

Saparyň dowamynda türkmen wekiliýeti Hytaýdaky Sung Çinlin adyndaky ýaşlaryň ylmy-tehniki we medeni gatnaşyklary merkezine baryp gördüler. Olar çagalaryň hemmetaraplaýyn ösüşi üçin döredilen şertler bilen tanyşdylar, şol sanda innowasion okuw usullaryny synladylar. Şeýle hem “Täzelikler giňişligi” bölümini we gadymy Hytaý medeniýetini şöhlelendirýän sahnalary synladylar — şol sanda Min we Tsin döwrüniň egin-eşikleriniň görkezilişi hem-de hytaý operasynyň parçalary görkezildi.