Russiýanyň Ylymlar akademiýasynyň Kosmos gözlegleri institutynyň Gün astronomiýasy barlaghanasynyň alymlary 13-nji maýda Günüň ýüzünde täze kuwwatly partlamanyň boljakdygy barada duýduryş berdiler. Hünärmenleriň çaklamalaryna görä, Gün tegmilleriniň işjeň topary täze energiýa toplamak tapgyryny tamamlaýar. Bu hadysa astronomlaryň yzygiderli gözegçiliginde saklanylýar we onuň Ýere ýetirip biljek täsirleri seljerilýär.

Geçirilen barlaglar we öňki hadysalaryň seljermesi bu çaklamanyň esasy bolup hyzmat etdi. Alymlar 7-nji we 10-njy maý aralygynda bolup geçen partlamalaryň arasyndaky wagt tapawudyny hasaba alyp, Gün energiýasynyň toplanma dowamlylygyny kesgitlediler. Şoňa görä-de, 13-nji maýda täze energetik işjeňligiň ýüze çykmak ähtimallygy örän ýokary diýlip hasaplanýar.

Häzirki wagtda Günüň işjeň sebitleriniň biri diskiniň gyrasyndan merkezine tarap süýşýär. Hünärmenleriň bellemegine görä, bu sebit 13-nji maýa çenli Ýer şaryna göni täsir edip biljek zolaga girer. Bu bolsa, Gün şöhlelenmesiniň we magnit tolkunlarynyň biziň planetamyzyň atmosferasyna täsiriniň artmagyna sebäp bolup biler.

Geçen günleriň dowamynda hem Günüň ýüzünde birnäçe gezek ýokary derejeli partlamalar hasaba alyndy. Hususan-da, 10-njy maýda ýüze çykan M5.7 klasly partlama häzirki wagtda Ýere tarap gönükýär. Bu hadysalar Ýeriň magnit meýdanynda wagtlaýyn üýtgeşmeleriň ýüze çykmagyna we tehnologik ulgamlaryň işine täsir etmegine sebäp bolup biler.