Özbegistan Respublikasynyň Prezidenti Şawkat Mirziýoýewiň Gazagystan Respublikasyna amala aşyran iş saparynyň çäklerinde iki döwletiň Baştutanlarynyň gatnaşmagynda möhüm resminama gol çekmek dabarasy boldy. Astana şäherinde guralan bu çäre öň gazanylan maýa goýum we söwda ylalaşyklaryny durmuşa geçirmegiň anyk ugurlaryny kesgitleýär. Täze resminama iki goňşy döwletiň arasyndaky haryt dolanyşygyny we ykdysady hyzmatdaşlygy täze şerefe götermäge gönükdirilendir.

Taraplaryň tassyklan «ýol kartasy» senagatyň we önümçiligiň iň esasy ugurlarynda bilelikdäki taslamalary amala aşyrmagy göz öňünde tutýar. Resminamada awtomobil gurluşygy, energetika ulgamy, himiýa senagaty, metallurgiýa we derman önümçiligi ýaly strategik pudaklarda hyzmatdaşlygy berkitmek bellenilip geçilýär. Bu başlangyçlar sebitde senagat kooperasiýasyny has-da kämilleşdirmäge ýardam eder.

Şeýle hem bilelikdäki meýilnamada logistika, gurluşyk materiallarynyň önümçiligi, ýaşaýyş jaý gurluşygy we oba hojalygy ýaly ugurlar boýunça anyk çäreler bellenildi. Transport we logistika ulgamyndaky hyzmatdaşlyk iki ýurduň üstarasy we eksport mümkinçiliklerini giňeltmäge şert döreder. Oba hojalyk pudagyndaky taslamalar bolsa sebitiň azyk üpjünçiligini has-da berkitmäge hyzmat eder.

Gepleşikleriň netijesinde gazanylan bu ylalaşyk, iki döwletiň Baştutanlarynyň şu ýylyň aprel we maý aýlarynda Buhara hem-de Türkistan şäherlerinde geçiren duşuşyklarynyň logiki dowмы boldy. Gol çekilen resminama öň yglan edilen strategik maksatlara iş ýüzünde ýetmek üçin esasy gural hökmünde hyzmat eder. Hünärmenleriň pikiriçe, bu ädim iki ýurduň arasyndaky uzak möhletleýin institusional gatnaşyklaryň täze tapgyryny emele getirýär.