Türkmen halkynyň Milli Lideri Arkadag şäherine amala aşyran iş saparynyň barşynda metjit toplumynyň çäginde gurluşygy dowam edýän täze muzeý binasynyň bezeg işleri bilen tanyşdy. Gahryman Arkadagymyz binanyň daşky görnüşindäki özboluşly şekillere we binagärlik aýratynlyklaryna ýokary baha berdi. Bu muzeýiň metjit toplumynyň umumy dizaýnyna goşýan goşandynyň ähmiýetini belläp, gurluşyk işleriniň bellenilen möhletlerde we ýokary hilli tamamlanmalydygy barada görkezmeler berdi.

Muzeýiň gurluşyk işleri häzirki wagtda tamamlaýjy tapgyrda alnyp barylýar. Taslamanyň maksatnamasyna laýyklykda, bu medeni ojakda türkmen halkynyň Milli Lideriniň durmuş ýoluna we halk bähbitli bitiren hyzmatlaryna degişli gymmatlyklar jemlener. Muzeýde Gahryman Arkadagymyzyň alyp baran giň gerimli işleriniň netijeleri, şeýle hem ýurduň taryhyndaky möhüm wakalar bilen baglanyşykly eksponatlar görkeziler.

Serginiň esasy gymmatlyklarynyň hatarynda Milli Liderimize dürli ýyllarda gowşurylan döwlet we halkara sylaglary, taryhy fotosuratlar hem-de Gahryman Arkadagymyzyň galamynyň astyndan çykan eserler ýerleşdiriler. Bu gymmatlyklar toplumy Milli Liderimiziň ýiti zehininiň, zähmet söýerliginiň we halkyna bolan çäksiz söýgüsiniň nyşany hökmünde geljekki nesiller üçin uly görelde mekdebi bolar.

Muzeýiň mazmunyny baýlaşdyrmak we gymmatlyklary ýerleşdirmek baradaky tekliplere jogap berip, Milli Liderimiz bu mesele boýunça Ministrler Kabinetine ýüzlenilmeginiň dogry boljakdygyny belledi. Bu bolsa muzeý işiniň halkara ülňülere laýyklykda guralmagyny we her bir gymmatlygyň taryhy ähmiýetiniň doly açylyp görkezilmegini üpjün eder. Täze muzeý şäheriň iň gelim-gidimli ýerleriniň birine öwrülip, türkmen halkynyň döwrebap taryhyny öwrenmekde möhüm orun tutar.