Gypjak obasynda ýerleşýän Türkmenbaşynyň ruhy metjidinde Türkmenistanyň Halk Maslahatynyň Ýaşulular geňeşiniň, Gurbanguly Berdimuhamedow adyndaky haýyr-sahawat gaznasynyň Ýaşulular geňeşiniň agzalarynyň hem-de ýurt dindarlarynyň gatnaşmagynda dabaraly maslahat guraldy. «Watan» habarlar gepleşiginde mälim edilişi ýaly, duşuşygyň dowamynda guramaçylyk meseleleri bilen bir hatarda, täze şäheriň ruhy binagärligine degişli möhüm teklip ara alnyp maslahatlaşyldy.

Maslahata ýygnanan il sylagly ýaşulular we din wekilleri türkmen halkynyň gadymdan gelýän ýol çekmek, köpri gurmak we metjit galdyrmak ýaly sogaply we ynsanperwer ýörelgeleriniň ähmiýetini nygtadylar. Şunuň bilen baglylykda, maslahatyň barşynda döwlet ähmiýetli Arkadag şäherinde gurluşygy alnyp barylýan, bir wagtda 30 müň adama dindarlyk borçlaryny berjaý etmäge mümkinçilik berýän nurana binalar toplumyny «Arkadagyň ruhy metjidi» diýip atlandyrmak baradaky başlangyç öňe sürüldi.

Habarda bellenilişi ýaly, bu başlangyç türkmen halkynyň Milli Lideriniň innowasion şäheriň döwrebap derejede gurulmagy we onuň ruhy binýadynyň berkidilmegi ugrunda edýän uly tagallalaryna raýatlaryň bildiren ýokary hormatynyň hem-de köpsanly ýüz tutmalarynyň netijesidir. Maslahata gatnaşan ýaşulularyň we dindarlaryň hemmesi bu taryhy çözgüdi biragyzdan goldap, gurluşygy dowam edýän desganyň «Arkadagyň ruhy metjidi» diýlip atlandyrylmagynyň bütin halkyň islegine laýyk gelýändigini bellediler.