Türkmenistanyň Ukrainadaky ilçihanasy tarapyndan Kiýew şäherinde Türkmenistanyň Medeniýet we sungat işgärleriniň güni hem-de Gündogaryň beýik akyldary Magtymguly Pyragynyň şygryýet güni mynasybetli baýramçylyk dabaralary guraldy. Ýurduň Daşary işler ministrliginiň habar bermegine görä, çäreleriň resmi bölegi Kiýewdäki Magtymguly Pyragynyň ýadygärligine gül goýmak dabarasy bilen başlandy. Oňa Ukrainanyň DIM-iniň hem-de Medeniýet ministrliginiň jogapkär wekilleri, daşary ýurtlaryň diplomatlary, medeniýet we ylym gurluşlarynyň wekilleri, şeýle hem ukrain paýtagtynda okaýan türkmen talyp ýaşlary we diasporasy uly işjeňlik bilen gatnaşdy.

Baýramçylyk maksatnamasy Türkmenistanyň diplomatik wekilhanasynyň binasynda guralan resmi kabul edişlik bilen dowam etdi. Türkmenistanyň Ukrainadaky ilçisi Toýly Ataýew öz çykyşynda ýurduň taryhy Garaşsyzlygynyň şanly 35 ýyllygyna ynamly barýandygyny belläp, milli mirasy gorap saklamagyň hem-de dünýäde durnukly wagyz etmegiň döwlet syýasatynyň özeni bolup durýandygyny ýetirdi. Ol Magtymguly Pyragynyň çuňňur manyly golýazmalarynyň ÝUNESKO-nyň «Dünýäniň hakydasy» sanawyna girizilmeginiň halkara ykrarnamanyň aýdyň nyşanydygyny nygtady. Dabarada «Magtymguly Pyragy» medalynyň iki gezek eýesi Pawel Mowçan şahyryň ynsanperwerlik ýörelgeleri barada täsirli çykyş etdi. Medeni maksatnamanyň çäginde bolsa talyplar Magtymguly Pyragynyň goşgularyny iki dilde okadylar, şeýle hem dutar-gyjagyň owazy astynda ajaýyp milli aýdym-sazlary ýerine ýetirdiler.