Häzirki wagtda dünýäniň köp sebitlerinde görülmedik yssy howanyň täsirleri ýüze çykýan pursatlarynda, şu gün halkara meteorologiýa gulluklary 2026-njy ýylyň başyndan bäri iň ýokary howa derejesini hasaba aldylar. Eýranyň Dehloran sebitinde hasaba alnan bu rekord görkezijide termometrinň sütünjigi Selsiý boýunça 52,1 gradusa çenli ýokarlandy. Bu görkeziji şu ýylyň dowamynda dünýä ýüzünde hasaba alnan iň ýokary we iň yssy howa derejesi hökmünde taryha girdi.

Hünärmenleriň bellemegine görä, hasaba alnan bu aşa gyzgynlyk 2026-njy ýylyň taryhy rekordy bolsa-da, ýurduň ähli döwürlerdäki iň ýokary görkezijisinden heniz pesligine galýar. Ýatlap geçsek, Eýran döwletinde taryhy absolýut rekord 2017-nji ýylda hasaba alnyp, şonda howanyň gyzgynlygy 53,7 gradus yssa çenli ýetipdi. Muňa garamazdan, Dehlorandaky şu günki ýagdaý dünýäde dowam edýän global maýlamanyň we howanyň üýtgemeginiň nobatdaky anyk subutnamasydyr.

Ekologlar we sinoptikler iýul aýynyň dowamynda dünýäniň dürli künjeklerinde anomal yssy howanyň we howa şertleriniň birden üýtgemeginiň ýene-de gaýtalanmagynyň mümkindigini öňünden duýdurypdylar. «MIR 24» habarlar agentliginiň berýän maglumatlaryna görä, Dehlorandaky rekord yssylyk sebitdäki gündelik durmuşa we energiýa ulgamlaryna uly täsirini ýetirýär. Halkara bilermenler şeýle şertlerde raýatlaryň saglygyny goramak we aşa yssydan goranmak çärelerini güýçlendirmegi maslahat berýärler.