Türkmenistanyň Halk Maslahatynyň Başlygy Gurbanguly Berdimuhamedow «Galkynyş» milli at üstündäki oýunlar toparynyň ýaşlary bilen duşuşyk geçirdi. Duşuşygyň dowamynda toparyň agzalarynyň gündelik türgenleşikleri, bilimi we durmuş şertleri barada giňişleýin söhbetdeşlik alnyp baryldy. Milli Lider öňde duran halkara ýaryşlarynda üstünlikli çykyş etmek ugrunda toparyň agzalaryna ak pata berdi.

Mälim bolşy ýaly, Niderlandlar Patyşalygynda ahalteke atlarynyň arasynda geçirilmeli atly sport we gözellik bäsleşiginiň dünýä çempionatyna ýurduň ýokary derejeli wekiliýetiniň gatnaşmagyny üpjün etmek maksady bilen guramaçylyk topary döredildi. Bu gurama başlyklyk edýän Gurbanguly Berdimuhamedow taýýarlyk işleriniň yzygiderli geçirilmegine gözegçilik edip, bu ugurda degişli maslahatlaryny berýär.

Söhbetdeşligiň barşynda diňe bir sport taýýarlygyna däl, eýsem ýaşlaryň okuw derejesine, olaryň maşgala ýagdaýlaryna hem-de durmuş-şahsy meselelerine hem aýratyn üns berildi. Milli Lider toparynyň her bir agzasy bilen içgin gürrüňdeş bolup, olaryň aladalary we islegleri bilen gyzyklandy.

Milli lybasda çykyş edýän ýaşlar bilen geçirilen duşuşykda döwlet tarapyndan sporty we milli medeniýeti ösdürmek üçin bütin mümkinçilikleriň döredilýändigi bellenildi. Türkmenistanyň abraýyny belentde tutmak, halkara meýdançalarynda ýokary ukyp-başarnyklary görkezmek we döwlet Tuguny parlatmak baradaky arzuwlar duşuşygyň mazmunyny düzdi.