Häzirki wagtda Ýewropanyň çempiony bolan Ispaniýanyň we Günorta Amerika kubogynyň eýesi Argentinanyň arasynda meýilleşdirilen abraýly «Finalissima» duşuşygy geçirilmez. Iki kontinentuň iň güýçli ýygyndylarynyň arasyndaky bu tutluşyk futbol janköýerleriniň uly gyzyklanmasyna sebäp bolupdy, emma taraplar oýnuň ýatyrylmagy barada netijä geldiler.

Duşuşyk aslynda 27-nji martda Kataryň «Lusaýyl» stadionynda bolmalydy. Emma Kataryň Futbol assosiasiýasy sebitdäki durnuksyz ýagdaýlary nazarda tutup, ýurtda meýilleşdirilen ähli halkara sport çärelerini wagtlaýynça togtatmak barada karara geldi. Bu ýagdaý Lionel Messi we Lamin Ýamal ýaly ýyldyzlaryň meýdandaky bäsleşiginiň näbelli möhlete çenli yza süýşürilmegine getirdi.

Mundan ozal oýny Madride, meşhur «Santýago Bernabeu» stadionyna geçirmek baradaky teklipler hem ara alnyp maslahatlaşyldy. Emma Argentinanyň Futbol assosiasiýasy bu meýdançada oýnamakdan resmi taýdan ýüz öwürdi. Şeýlelikde, guramaçylar oýny başga bir ýere geçirmegiň deregine, ony doly ýatyrmagy has amatly bildiler.

Ýatlap geçsek, «Finalissima» kubogynyň häzirki eýesi Argentina ýygyndysydyr. Olar 2022-nji ýylda Londonyň «Wembli» stadionynda geçirilen taryhy oýunda Italiýany 3:0 hasabynda ýeňip, bu tituly alypdylar. Täze duşuşygyň ýatyrylmagy bilen, ýaryşyň geljegi baradaky resmi maglumatlara garaşylýar.