Ýewropanyň iň abraýly klub ýaryşynda ýarym final tapgyryna çykan toparlaryň atlary anyklandy. Kubogyň häzirki eýesi «Pari Sen-Žermen» finala barýan ýolda Germaniýanyň «Bawariýa» topary bilen güýç synanyşar. Beýleki jübütlikde bolsa Angliýanyň «Arsenal» topary Ispaniýanyň «Atletiko» kluby bilen duşuşar. Ýarym finalyň ilkinji oýunlary 28–29-njy aprelde, jogap duşuşyklary bolsa 5–6-njy maýda geçiriler. Ýaryşyň ýeňijisini kesgitlejek final duşuşygy 30-njy maýda Budapeştde bolar.

«Bawariýa» çärýek finalda Madridiň «Realyny» ýaryşdan çykaryp, uly şowhun döretdi. Myunhendäki jogap oýny 4:3 hasabynda nemesleriň peýdasyna tamamlanyp, Pawlowiç, Keýn, Dias we Olise dagy tapawutlandy. «Realda» Arda Güleriň iki goly we Mbappeniň tagallasy ýeterlik bolmady. Duşuşygyň ahyrynda oýunçylaryň arasynda dartgynlylyk ýokarlanyp, «Realydan» Kamawinga we oýun tamamlanandan soň Güler gyzyl kartlar aldylar. Şeýle-de «Bawariýanyň» tälimçisi Wensan Kompani sary kart almagy sebäpli indiki duşuşygy triunadan synlamaly bolar.

Londonly «Arsenal» bolsa Portugaliýanyň «Sportinginden» üstün çykyp, ýarym finala tarap ýoluny dowam etdirdi. Birinji oýundaky 1:0 hasabyndaky ýeňişden soň, öz meýdançasynda golsuz deňme-deň oýnan «topçular» indiki tapgyra çykdylar. Bu netije londonlylar üçin taryhy ähmiýete eýedir, sebäbi klub öz taryhynda ilkinji gezek iki möwsüm yzly-yzyna Çempionlar ligasynyň ýarym finalyna çykmagy başardy.

Garaşylýan ýarym finallar uly gyzyklanma döredýär, sebäbi geçen möwsümde «Arsenal» hut şu tapgyrda «Pari Sen-Žermenden» ýeňlipdi. Häzirki wagtda londonlylar şol şowsuzlygyň öwezini dolmaga çalşarlar. «Bawariýa» we «PSŽ» arasyndaky duşuşyk bolsa ýewropa futbolynyň iň güýçli klublarynyň bäsleşigi hökmünde häsiýetlendirilýär. Budapeştde geçiriljek finala çykmak ugrundaky göreş aprel aýynyň ahyrynda badalga alar.