Polşa Respublikasynyň paýtagtynda Türkmenistanyň Döwlet migrasiýa gullugynyň başlygy A.Sazakow we Polşanyň Içeri işler ministrliginiň Döwlet serhet gullugynyň ýolbaşçysy Robert Bagan resmi duşuşyk geçirdiler. Gepleşikleriň netijesi boýunça iki ýurduň degişli edaralarynyň arasynda migrasiýa babatda hyzmatdaşlyk etmek barada özara düşünişmek Ähtnamasyna gol çekildi.

Resmi duşuşygyň dowamynda taraplar global derejede parahatçylygy, howpsuzlygy we durnukly ösüşi üpjün etmek meselelerine aýratyn üns berdiler. Şeýle-de söhbetdeşler häzirki zaman halkara migrasiýa ulgamynyň geljegi hem-de bu ugurda ikiçäk gatnaşyklaryň strategik ähmiýeti barada giňişleýin pikir alyşdylar.

Täze resminama laýyklykda, iki döwletiň gulluklary özara tejribe alyşmagy, amaly maglumatlaryň geňeşmelerini ýola goýmagy we bilermenleriň duşuşyklaryny yzygiderli gurnamagy meýilleşdirýärler. Taraplar bu Ähtnamanyň geljekki özara bähbitli gatnaşyklary ösdürmekde ygtybarly binýat boljakdygyny belläp, bilelikdäki işleri işjeň dowam etdirmäge taýýardyklaryny tassykladylar.