Fransiýanyň dizaýnerlik öýi «Louis Vuitton» hem-de Kaliforniýanyň awtomobil sazlaşdyryjy «Singer» atelýesi bilelikdäki täze taslamanyň çäklerinde «Porsche 911» modeliniň binýadynda iki sany kaşaň sportkary tanyşdyrdylar. Bu taslama fransuz moda brendiniň awtomobil senagatyndaky ilkinji resmi hyzmatdaşlygy bolup taryha girdi.

Döredilen ulaglaryň ilkinjisi — zagpyran reňkli «Porsche 911 Reimagined by Singer — Classic» atly kupe modeli bolup, ol özboluşly nagyşlar bilen bezeldi. Ekinji modeli bolsa ak reňkdäki «Classic Turbo» kabrioleti bolup, munda «Louis Vuitton» brendiniň dizaýnerlik mekdebiniň özboluşly täsirleri we ýörite işlenip düzülen dizaýn çözgütleri ulanyldy.

Ulaglaryň salonlary doly modernizasiýa edilip, içerki bezeg işlerine şweýsar sagat öndürijisi «La Fabrique du Temps» kompaniýasynyň hünärmenleri hem gatnaşdylar. Merkezi konsola aýrylyp-dakylýan mehaniki sagatlar ýerleşdirildi, içki düwmeler rodiý örtükli metallar bilen çalşyryldy we oturgyçlar ýokary hilli tebigy deri bilen örtüldi. Şeýle hem brend tarapyndan bu modeller üçin ýörite çemodanlar toplumy we sport aksessuarlary taýýarlanyldy.

Tehniki aýratynlyklary boýunça kupe modeli 390 at güýjüne eýe bolan 4,0 litrlik atmosferaly motor bilen, kabriolet bolsa 510 at güýjündäki 3,8 litrlik turbokompressorly motor bilen enjamlaşdyryldy. Eýe bolan mehaniki tizlik geçiriji ulgamlary we özboluşly dizaýnlary bilen bu kolleksion modeller awtomobil dünýäsinde uly gyzyklanma döretdi.