Demirgazyk Kaliforniýanyň Federal okrug kazyýeti telekeçi Elon Mask we OpenAI tehnologiýa kompaniýasynyň arasyndaky köpçüligiň ünsüni çeken kazyýet işini jemledi. Kazyýet edaralary milliarderiň guramanyň ýokary dolandyryşyna, şol sanda onuň baş direktory Sem Altman we prezidenti Greg Brokman dagylara garşy öňe süren ähli talaplaryny resmi taýdan ret etdi.

Halkara habar beriş serişdeleriniň ýaýradan maglumatlaryna görä, bu karar oturdaşlar kazyýeti tarapyndan biragyzdan kabul edildi. Derňewi bes etmek üçin esasy hukuk esasy hökmünde şikaýat arzasynyň aýyplaýjy tarap tarapyndan şeýle görnüşli dawalar üçin kanunçylykda bellenilen prosessual möhletler geçenden soň tabşyrylandygy görkezildi.

Üç hepdeläp dowam eden kazyýet diňlenşiginiň dowamynda oturdaşlar topary kompaniýanyň içerki korporatiw hat-habarlaryny jikme-jik öwrendiler we taraplaryň esaslandyrmalaryny diňlediler. Jemleýji karar iki sagatlyk ýapyk maslahatlaşmadan soň mälim edildi. Gutarnykly prosessual karary kabul etmeli kazy Iwonn Gonsales Rojers eýýäm oturdaşlaryň netijeleri bilen doly ylalaşýandygyny we bu işi gysga wagtda ýapmaga taýýardygyny aýtdy.

Ýatlap geçsek, bu işiň çäklerinde Elon Mask emeli aň platformasyna diňe täjirçilik maksatly bolmadyk ylmy-gözleg taslamasy hökmünde seredip, oňa 38 million dollar töweregi maýa goýandygyny öne sürüpdi. Işewür adam OpenAI-yň ýolbaşçylarynyň emeli aňy jemgyýetiň bähbidine ösdürmegiň deregine, işi täjirçilik ugruna gönükdirip, ilkinji ylalaşyklary bozandygyny nygtady. Mask özüniň çeken zyýanynyň öwezini dolmak hökmünde Altmanyň we Brokmanyň wezipelerinden çetleşdirilmegini, gaznanyň täjirçilik bölüminiň ýapylmagyny hem-de 150 milliard dollara çenli bolan öwezini doluş töleginiň berilmegini talap edipdi.