Amerikaly milliarder Ilon Mask 2027-nji ýylda ABŞ-da ýaşaýan her bir çaga özüniň «SpaceX» aerokosmos kompaniýasynyň bir paýnamasyny sowgat bermegi meýilleşdirýändigini yglan etdi. Bu barada telekeçi «X» sosial ulgamyndaky şahsy sahypasynda habar berdi diýip, «Business Insider» neşiri ýazýar. Maskyň aýtmagyna görä, paýnamalary paýlamak çäresi geljekdäki şeýle giň gerimli maýa goýum başlangyçlarynyň diňe ilkinji tapgyry bolar. Şol bir wagtyň özünde, telekeçi gymmatly kagyzlary bermegiň takyk tertibini, olary kimleriň alyp biljekdigini we haýsy şertleriň berjaý edilmelidigini entek jikme-jik mälim etmedi.

2002-nji ýylda döredilen «SpaceX» kompaniýasy raketa-kosmos tehnikalaryny işläp düzmek we «Starlink» global hemralaýyn internet aragatnaşyk ulgamyny dolandyrmak bilen meşgullanýar. «Business Insider» neşiriniň baha bermegine görä, milliarderiň bu yglan eden başlangyjy ABŞ-da ýaşaýan takmynan 72 million çaga göni täsir edip biler. «SpaceX»-iň paýnamalarynyň häzirki bazardaky bahasyny göz öňünde tutsaň, Maskyň çagalara paýlamagy meýilleşdirýän gymmatly kagyzlarynyň umumy bahasy takmynan 10,5 milliard dollara deň bolup durýar.

Häzirki wagtda ABŞ-da Prezident Donald Trampyň administrasiýasynyň «Trump Accounts» diýlip atlandyrylýan ýörite maksatnamasy hem hereket edýär. Ol çagalar üçin ilkinji maýa goýum hasaplaryny döretmegi göz öňünde tutup, 2025-nji ýyldan 2028-nji ýyl aralygynda doglan çagalara döwlet tarapyndan 1 000 dollar möçberinde ilkinji maýa goýum tölegini kepillendirýär. Häzirlikçe «SpaceX» paýnamalarynyň şol döwlet maksatnamasy arkaly geçiriljekdigi ýa-da munuň üçin aýratyn hususy mehanizmiň dörediljekdigi barada takyk maglumat berilmedi.