Amerikanyň «Remitly» kompaniýasy tarapyndan geçirilen täze barlagyň netijelerine görä, Ýaponiýa dünýäniň iň mylakatly we sypaýy ilatly ýurdy diýlip yglan edildi. Bu barlag 26 ýurtdan 4600-den gowrak adamyň arasynda geçirilen pikirsoraşmalara esaslanýar. Gatnaşyjylaryň 35,15%-i Kündogar Aziýanyň bu döwletini sypaýyçylyk kadalary boýunça dünýäde lider hökmünde görkezdiler.

Barlagyň awtorlary ýapon jemgyýetinde sypaýyçylygyň diňe bir endik däl, eýsem gündelik durmuşyň aýrylmaz medeni bölegidigini belleýärler. Ýaponiýada salamlaşmak, minnetdarlyk bildirmek we hormat goýmak alamaty hökmünde ulanylýan baş egmek dessury hem-de diliň sylaşykly görnüşleri (keigo) munuň aýdyň subutnamasydyr. Bu ýerde özara gatnaşyklarda sypaýyçylyk iň ýokary gymmatlyk hasaplanýar.

Sanawyň ikinji ornuny 13,35% netije bilen Kanada eýeledi. Kanadaly talyplaryň we raýatlaryň islendik ýagdaýda aşa köp ötünç soraýandygy baradaky stereotip hakykaty birneme ýönekeýleşdirse-de, barlag kanadalylaryň beýleki adamlaryň şahsy çäklerine we hukuklaryna uly hormat goýýandygyny tassyklady. Üçünji orunda bolsa 6,23% bilen Beýik Britaniýa ýerleşdi. Britanlarda mylakatlylyk esasan "haýyş edýärin" we "sag boluň" jümleleriniň ýygy ulanmagy hem-de nobata durmak medeniýeti bilen häsiýetlendirilýär.

Gyzykly tarapy, ýurtlaryň ilatynyň öz-özüne berýän bahasy daşarky synçylaryň pikirinden düýpli tapawutlanýar. Meselem, Braziliýanyň, Hindistanyň we Fransiýanyň ilaty özlerini dünýäde iň mylakatly adamlar hasaplaýarlar. Sanawyň lideri bolan sypaýy we pespäl ýaponlar bolsa, öz-özüne baha bermekde 25-nji orna düşdüler. Bu bolsa hakyky sypaýyçylygyň köplenç pespälilik bilen utgaşýandygyny görkezýär.