Ýaponiýanyň Hökümeti şu ýylyň iýul ayýndan başlap, daşary ýurt raýatlary üçin bir gezeklik giriş wizasyny resmileşdirmek boýunça döwlet ýygymlaryny birden bäş esse artdyrmak barada gutarnykly karar kabul etdi. Täze düzgünnamalara görä, öň 3 müň ýen bolan wiza tölegi indi 15 müň ýene çenli ýokarlandyrylar. Bu barada Ýaponiýanyň meşhur «Kyodo» habarlar agentligine salgylanýan «Belta.by» neşiri habar berýär.

Ýurtda wiza ýygymlarynyň gymmatlatylmagy baradaky çäre hümmetsizlenme (inflýasiýa) we milli pul bolan ýeniň halkara derejesinde gowşamagy bilen baglylykda, 1978-nji ýyldan bäri ilkinji gezek durmuşa geçirilýär. Ýaponiýanyň Daşary işler ministri Tosimisu Motegi metbugat ýygnagynda eden çykyşynda: «Biz bu ykdysady çözgüdiň ýurtda barha ösýän giriş syýahatçylygyna dessine gowşadyjy täsirini ýetirjekdigine garaşmaýarys» diýip, munuň durnuklylygy gorap saklamak üçin zerurdygyny nygtady.

Halkara metbugatynyň habar bermegine görä, wiza ýygymlarynyň mukdarynyň birden beýgeldilmegi Ýaponiýanyň maliýe we migrasiýa töleglerini «Uly ýedilige» (G7) agza beýleki öňdebaryjy döwletleriň hereket edýän derejelerine we standartlaryna utgaşdyrmak hem-de deňleşdirmek maksady bilen kabul edildi.