Gazagystanyň Almaty oblastynda amala aşyrylýan «Dala Stage Creative Tech Park» atly täze kinopawilýonyň gurluşygy dünýä belli aktýor Jeki Çanyň sowgady bilen dabaralandy. Meşhur aktýor täze taslamanyň binýadyna goýmak üçin özüniň ýörite «wagt kapsulasyny» iberdi. Bu taryhy sowgat gurluşyk meýdançasyna dikuçar arkaly getirilip, režissýor Robert Kuna dabaraly ýagdaýda gowşuryldy.

Täze studiýanyň gurluşygy halkara kino taslamalary üçin möhüm ähmiýete eýedir. Bu ýerde Jeki Çanyň gatnaşmagynda meşhur filmiň dowamy bolan «Hudaýyň ýaraglary 4: Talap» atly täze ekran eseriniň surata düşürilmegi meýilleşdirilýär. Taslamanyň prodýuseri Li Çiu Wa aktýoryň bu taslamanyň bary-ýogy alty aýyň içinde amala aşyrylyp başlanmagyna ýokary baha berýändigini we gazagystanlylara üstünlik dileýändigini ýetirdi.

Sebitiň häkimi Marat Sultangaziýewiň bellemegine görä, bu döwrebap desga ýerli hünärmenlere dünýäniň öňdebaryjy kinostudiýalary bilen bäsleşmäge şert döreder. 15 gektar meýdany öz içine alýan «Dala Stage» tehnoparky sebitde döredijilik industriýasynyň ösmegine we halkara hyzmatdaşlygyň berkemegine güýçli itergi berer. 3 000 inedördül metrlik gurluşyk bölegi iň täze tehnologiýalar bilen üpjün ediler.

Gurluşyk işleriniň şu ýylyň awgust aýynda tamamlanmagyna garaşylýar. Jeki Çanyň täze filmi bilen işe giriziljek bu studiýa diňe bir Gazagystanyň däl, eýsem tutuş sebitiň kino sungatynyň täze belentliklere göterilmegi üçin möhüm binýat bolar. Bu innowasion taslama halkara kino dünýäsiniň ünsüni Merkezi Aziýa çekmäge ýardam eder.