Marokko Patyşalygynda ýurduň iň beýik binasy bolan «Mohammad VI diňiniň» açylyş dabarasy boldy. Patyşanyň tabşyrygy boýunça geçirilen bu dabara mirasdüşer şazada Mulaý El-Hasan gatnaşdy. Beýikligi 250 metre ýetýän bu täze gurluşyk Rabat we Sale şäherleriniň çäklerinde seleňläp görünýän binagärlik desgasyna öwrüldi.

Bu ägirt uly bina 55 gatdan ybarat bolup, onuň umumy meýdany 100 müň inedördül metre deňdir. Köpugurly binanyň içinde edara jaýlary, kaşaň ýaşaýyş öýleri, ýokary derejeli myhmanhana we taryhy mirasy öwrenmäge niýetlenen obserwatoriýa ýerleşýär. Mundan başga-da, desga söwda nokatlary we döwrebap restoranlar bilen üpjün edilip, onda jemi 36 sany tizlikli lift hyzmat edýär.

Binanyň gurluşygynda häzirki zaman ekologiýa talaplaryna we «ýaşyl» tehnologiýalara aýratyn orun berildi. Desga ýagyş suwuny gaýtadan işleýän ulgamlar we Gün energiýasyndan peýdalanýan güýçli paneller bilen enjamlaşdyryldy. Netijede, bina halkara derejeli LEED Gold we HQE ekologik şahadatnamalaryna mynasyp boldy hem-de Afrikanyň iň beýik desgalarynyň sanawynda ikinji orny eýeledi.

Sekiz ýylyň dowamynda gurlan bu diň «Rabat — Marokkonyň medeniýet paýtagty» atly maksatnamanyň möhüm bölegi bolup durýar. Bu taslama Bu-Regreg derýasynyň jülgesini döwrebaplaşdyrmaga we ýurduň binagärlik keşbini täzelemäge gönükdirilendir. «Mohammad VI diňi» diňe bir döwlet nyşany bolman, eýsem sebitiň ykdysady we syýahatçylyk mümkinçiliklerini artdyrjak iri merkezi hasaplanýar.