Italiýa dünýäniň taryhynda öý haýwanlarynyň saglygy bilen baglylykda işgärlere tölegli dynç gününi berýän ilkinji ýurt hökmünde uly ädim ätdi. 2026-njy ýylyň martyndan başlap, bu ýurtda agyr ýagdaýdaky öý haýwanyna ideg etmek işden tölegli rugsat almak üçin resmi esas hökmünde kabul edildi. Bu karar Italiýanyň haýwanlaryň hukuklaryna we adamlaryň wepaly dostlaryna bolan jogapkärçiligine berýän ýokary bahasynyň subutnamasydyr.

Täze kanunçylyga laýyklykda, işgärler her ýyl 3 güne çenli tölegli rugsat almaga hukuk gazandylar. Şunlukda, haýwanyň eýesi weterinar lukmanyndan degişli resminamany görkezmelidir we haýwanyň gyssagly kömege mätäçdigini subut etmelidir. Şeýle hem, haýwanyň (it ýa-da pişik) hökmany suratda döwlet tarapyndan hasaba alnan bolmagy we ýörite mikroçip bilen üpjün edilmegi esasy şertleriň biri bolup durýar.

Bu taryhy kararyň düýbi 2017-nji ýylda «Kuçolanyň işi» diýlip atlandyrylan kazyýet karary bilen tutuldy. Şonda Rim uniwersitetiniň işgäri kesellän itine ideg etmek üçin tölegli rugsat almaga hukuk gazanypdy. Kazyýet öz kararynda Italiýanyň Jenaýat kodeksiniň 727-nji maddasyna salgylanyp, haýwany ejir çekýän ýagdaýynda taşlap gitmegiň jenaýatdygyny nygtady. Şunlukda, öý haýwanyna ideg etmek zähmet kanunçylygynda «maşgala sebäbi» hökmünde ykrar edildi.

Dünýädäki haýwanlary goramak baradaky guramalar Italiýanyň bu başlangyjyny gyzgyn goldadylar. Hünärmenleriň pikiriçe, bu düzgün haýwan eýelerini kyn saýlaw öňünde goýman, olaryň işine we haýwanlarynyň saglygyna deň derejede üns bermeklerine şert döredýär. Täze düzgün Italiýanyň zähmet hukuklary we haýwanlaryň abadançylygy ulgamyndaky nusgalyk tejribesini bütin dünýä aýan edýär.