«Apple» kompaniýasy «iPhone 18 Pro» we «iPhone 18 Pro Max» smartfonlary üçin «Apple Reference Image» diýlip atlandyrylýan döwrebap tehnologiýany hödürledi. Täze ulgam suratyň başda emeli aň arkaly döredilmän, eýsem enjamyň hakyky kamerasy arkaly düşürilendigini hem-de soňy bilen redaktirlenmändigini kepillendirmäge mümkinçilik berýär. Bu baradaky giňişleýin maglumatlar «Turkmen Expo» kompaniýasynyň habar gullugynyň üsti bilen tanyşdyryldy.

Kompaniýa bu innowasion çözgüdi generatiw emeli aň eýýamynyň sanly negatiwi diýip atlandyrýar. Ýörite rejim işjeňleşdirilen wagtynda, kamera sensory suraty düşüren badyna piksel maglumatlaryny kriptografik gol arkaly tassyklaýar. Şunlukda, suratyň ilki başky sensor maglumatlaryny we kriptografik wagt belliklerini öz içine alýan ygtybarly nusgasy döredilip, enjamyň ýatda saklaýjysynda saklanýar.

Barlag işlerini geçirmek üçin goragly maglumatlar göni «Private Cloud Compute» bulut hasaplaýyş ulgamyna geçirilýär we şol ýerde gaýtadan dikeldilýär. Kompaniýanyň hünärmenleriniň bellemegine görä, bu ulgam maglumatlaryň galplaşdyrylmagyndan, operasion ulgamyň döwülmeginden hem-de kiberhüjümlerden doly goraglydyr. Ulgam her bir surat üçin ynam derejesini awtomatiki usulda hasaplaýar.

Eger-de suratda kandyr bir üýtgetmeler ýa-da galplyklar ýüze çykarylan ýagdaýynda, «Apple» şol konkrret surata bolan ynam derejesini yza alyp bilýär.

Mundan başga-da, bu ulgam kiberhowpsuzlyk hem-de gizlinlik kadalaryna doly wepaly bolup galýar. Ol suratçynyň şahsy maglumatlaryny köpçülige açmaýar we bir sensor arkaly düşürilen dürli suratlary özara baglanyşdyrmaga hem ýol bermeýär.