Aşgabatda Abu-Dabiniň weloklubynyň we Türkmenistanyň milli ýygyndy toparynyň bilelikdäki okuw-türgenleşik ýygnanyşyklary geçirilýär. Çäre ýurduň Ministrler Kabinetiniň mejlisinde tassyklanan meýilnamalara laýyklykda guraldy we 4—20-nji awgust aralygynda dowam eder.

Birleşen Arap Emirliklerinden (BAE) gelen topary klubyň ýolbaşçylary, tälimçiler düzümi, tehniki hünärmen we 24 sany türgen — jemi 28 adam düzýär. Myhmanlar paýtagtymyzyň «Türgenler» myhmanhanasynda ýerleşdirildi, olaryň türgenleşikleri bolsa Olimpiýa şäherçesiniň sport desgalarynda hem-de şäheriň awtomobil ýollarynda geçirilýär.

Türgenleriň şosse türgenleşikleri Atatürk, Arçabil, Köpetdag şaýollarynda we Gökdere jülgesiniň gözel künjeklerinde guraldy. Ýygnanyşyklaryň maksatnamasy 60-dan 150 kilometre çenli bolan dürli aralyklary öz içine alýar we türgenler okuw-türgenleşikleriň dowamynda jemi 1270 kilometre golaý ýoly welosipedli külterlärler.

Ýöriteleşdirilen welotrekde alty türgenleşik we üç sany okuw-usulyýet maslahatyny geçirmek meýilleşdirildi. Bu çäreler ýol hereketiniň howpsuzlygyny we lukmançylyk kömegini üpjün etmek üçin degişli döwlet edaralary bilen utgaşykly amala aşyrylýar.

Abu-Dabiniň welokluby bilen Türkmenistanyň federasiýasynyň arasyndaky sport hyzmatdaşlygy yzygiderli häsiýete eýe bolup, ol 2023-nji ýyldan bäri üstünlikli ösdürilýär. Häzirki ýygnanyşyklara baş tälimçi Kakabaý Ataýewiň we onuň kömekçisi Igor Ýoldaşowyň ýolbaşçylygynda 15 sany türkmen welosipedçisi gatnaşýar.

Aşgabatdaky bilelikdäki taýýarlyk tamamlanansoň, Türkmenistanyň milli ýygyndysy 28–30-njy awgust aralygynda geçiriljek trek ýaryşlary boýunça Aziýa Kubogyna gatnaşmak üçin Tailanda ugrar. Milli ýygyndy üçin möwsümiň esasy ýaryşy bolsa Ýaponiýada geçiriljek Aziýa oýunlary bolar.