Türkmenistanyň Daşary işler ministrliginiň Halkara gatnaşyklary institutynda «Halkara gatnaşyklar: parahatçylykly dialogyň medeniýeti» atly III halkara bäsleşiginiň dabaraly açylyşy boldy. Bu abraýly çäre dünýäniň dürli künjeklerinden gelýän ýaş hünärmenleri we geljekki diplomatlary bir ýere jemledi. Bäsleşik häzirki zaman dünýä syýasatynda parahatçylykly gepleşikleriň ähmiýetini öňe sürmekde möhüm meýdança öwrüldi.

Akyl oýunlaryna dünýäniň 9 döwletinden, şol sanda Russiýadan, Hytaýdan, Beýik Britaniýadan we Eýrandan wekiller gatnaşýarlar. Bäsleşige daşary ýurtlaryň öňdebaryjy ýokary okuw mekdeplerinden 40-dan gowrak wekil, şeýle hem Türkmenistanyň özünden 117 sany talyp gatnaşyp, özara tejribe alyşýarlar. Gatnaşyjylaryň geografiýasynyň giňligi bu çäräniň halkara ylmy jemgyýetçiliginde uly gyzyklanma döredýändigini görkezýär.

Bäsleşigiň çäklerinde geçirilen gepleşikleriň özeni durnukly ösüşi we parahatçylygy üpjün etmekde halkara guramalarynyň, aýratyn-da, Birleşen Milletler Guramasynyň ornuny berkitmek meselesine bagyşlandy. Ýaş diplomatlar ählumumy meseleleri çözmekde diplomatik mehanizmleriň mümkinçiliklerini seljerdiler. Şeýle hem Türkmenistanyň energetika we azyk howpsuzlygy, ekologiýa ýaly möhüm ugurlardaky başlangyçlary gatnaşyjylaryň üns merkezinde boldy.

Forumyň medeni maksatnamasy hem örän baý boldy. Myhmanlar Türkmenistanyň Döwlet muzeýine baryp, türkmen halkynyň köpasyrlyk taryhy we medeni mirasy bilen ýakyndan tanyşdylar. Şeýle çäreler diňe bir ylmy bäsleşik bolman, eýsem dürli halklaryň medeniýetleriniň ýakynlaşmagyna we ýaşlaryň arasynda dostlukly gatnaşyklaryň berkemegine ýardam edýär.

 

 

Kemal WELMÄMMEDOW,

Türkmenistanyň Daşary işler ministrliginiň Halkara gatnaşyklary institutynyň talyby