Oýun sanawy
Ýagşygeldi Kakaýew adyndaky uniwersitetde mekdep okuwçylarynyň intellektual bäsleşigi başlandy
14 Aprel. 06:35Türkmenistanyň Bilim ministrliginiň goldawy bilen Ýagşygeldi Kakaýew adyndaky Halkara nebit we gaz uniwersitetinde mekdep okuwçylarynyň arasynda ders olimpiadasynyň başlangyç tapgyry guraldy. Bu bäsleşik matematika, himiýa we informatika ýaly möhüm ugurlary öz içine alyp, ýaş zehinleri ýüze çykarmaga we olaryň ylma bolan höwesini artdyrmaga gönükdirilendir.
Mekdep okuwçylarynyň bu intellektual bäsleşigine gatnaşmaga jemi 744 sany okuwçy isleg bildirdi. Uniwersitetiň hünärmenleri tarapyndan döredilen ýörite sanly ulgam arkaly ýumuşlaryň netijeleri dessine seljerildi. Döwrebap programma üpjünçiligi bäsleşigiň aýdyňlygyny we takyklygyny üpjün edip, iň ýokary görkezijileri gazanan okuwçylary awtomatik usulda kesgitledi.
Gelen netijelere görä, birinji tapgyryň ahyrynda 189 sany okuwçy şahsy görkezijiler boýunça ýeňiji diýlip yglan edildi. Bu ýaşlar öz bilim derejelerini subut edip, bäsleşigiň indiki tapgyrynda ýaryşmaga hukuk gazandylar. Netijeleriň seljermesi uniwersitetiň tehnologik mümkinçilikleriniň bäsleşikleri halkara standartlara laýyk guramaga şert döredýändigini görkezdi.
Olimpiadanyň jemleýji tapgyry 25-nji aprelde uniwersitetiň binasynda geçiriler. Ir sagat 10:00-da başlanjak bu aýgytly bäsleşikde okuwçylar baş baýraklar ugrunda özara güýç synaşarlar. Şeýle çäreler ýokary okuw mekdepleri bilen orta mekdepleriň arasyndaky hyzmatdaşlygy berkitmekde we geljekki hünärmenleri taýýarlamakda uly ähmiýete eýedir.
Şeýle hem okanyň
Türkmenistandaly mekdep okuwçylary mental arifmetika boýunça dünýä çempionatynda uly üstünlik gazandylar
10 Sen. 11:395-7-nji sentýabr aralygynda Germaniýanyň Bilefeld şäherinde çagalaryň we ýetginjekleriň arasynda mental hasaplamak boýunça dünýä çempionaty (Junior Mental Calculation World Championship 2026) geçirildi. Bu abraýly halkara bäsleşige Hytaý, Ýaponiýa, Germaniýa we Fransiýa ýaly dünýäniň 14 döwletinden 100-den gowrak iň zehinli okuwçylar gatnaşyp, iki sagadyň dowamynda çylşyrymly matematiki amallary diňe ýatdan çözmek boýunça bäsleşdiler.
Ýurt boýunça geçirilen saýlama tapgyrdan üstünlikli geçip, bäsleşige kabul edilen 12 sany türkmen okuwçysy halkara synagda ýokary netijeleri görkezdiler. Bäsleşikde Türkmenabat şäherindäki 41-nji orta mekdebiň 7-nji synp okuwçysy hamana «Kämil Bilim» okuw merkeziniň uçurymy Mekan Nurgeldiýew Junior-1 kategoriýasynda 2477 bal toplap, dünýä boýunça 3-nji orny eýeledi. Şeýle hem ýurdumyzyň mental arifmetika boýunça milli rekordçysy Liwanur Berdiýewa Senior kategoriýasynda iň gowy 8 gatnaşyjynyň hataryna girdi.
Türkmenistanyň ýygyndy toparyna «Kämil bilim» merkeziniň mugallymlary Jahan Durdymämmedowa we Halym Annagurbanow ýolbaşçylyk etdiler. Türkmen okuwçylarynyň bu halkara ýaryşda eýeleýän ýokary orunlary eýýäm däp öwrülip, olar geçen ýyl hem iň gowy onlugyň hataryna girmegi başarypdyrlar.
Blitz