Halkara futbol assosiasiýalary federasiýasynyň (FIFA) prezidenti Janni Infantino Ýewropa, Aziýa, Demirgazyk we Merkezi Amerika konfederasiýalarynyň garşylyklaryndan soň, futbol boýunça dünýä çempionatlaryny geçirmäge hususy maýadarlary çekmek baradaky teklip taslamasyny yzyna aldy.

«Ähli pikirleri dykgat bilen diňläp, men bir zada düşündim, bu taslama şeýle bir bölünişige getirdi welin, taslamanyň goldaw derejesine garamazdan, ol mundan beýläk göz öňünde tutulan maksatlara hyzmat etmeýär» – diýip, Infantinonyň beýanatyny «Reuters» agentligi getirýär.

Sport ýolbaşçysynyň bu başlangyjyny Ýewropanyň futbol assosiasiýalarynyň birleşigi (UEFA), Demirgazyk, Merkezi Amerika we Karib basseýniniň futbol konfederasiýasy (KONKAKAF) hem-de Aziýa futbol konfederasiýasy (AFK) berk ýazgardy. Bu bolsa Infantinonyň taslamasynyň FIFA-da barybir köp ses alyp bilmejekdigini aňladýardy, sebäbi dünýäniň milli futbol federasiýalarynyň we birleşikleriniň tas üçden iki bölegi bu üç guramanyň düzümine girýär.