Hindistanyň Çhattisgarh ştatynda ýerleşýän Harwe obasynda durnuksyz we sarsydyjy waka ýüze çykdy. Ýerli azyk dükanynyň eýesi, 50 ýaşly Ramsahaý Jaýswal soňky dört aýyň dowamynda sekiz sany obadaşyny meýilli ýagdaýda zäherländigi üçin polisiýa tarapyndan tussag edildi. «The Times of India» neşiriniň maglumatlaryna salgylanýan «rg.ru» saýtynyň habar bermegine görä, derňewde jenaýatçy özüniň göwnüne degen ýaşaýjylary zäherlemek üçin ýörite meýilnama düzendigini boýun aldy. Ol munuň üçin ilki goňşusyndan «gemrijileri ýok edýän zäher» diýip awy satyn alypdyr we onuň güýjüni barlamak üçin eýesiz ite berip görüpdir. It ölenden soň, ol betniýetli dildüwşügini amala aşyryp başlapdyr.

Jaýswal özünden öýkelän ýa-da göwnüne degen obadaşlaryny dürli bahanalar bilen gezekme-gezek öýüne myhmançylyga çagyryp, olaryň içgilerine zäher goşupdyr. Ol bu gabahat işiniň sebäplerini düşündirende, goňşularynyň öz üstünden gülendiklerini, pul bergilerini öz wagtynda bermändiklerini, tersokanlyk (jadygöýlik) bilen meşgullanýandyklaryny we dürli syýasy garaýyşlarynyň bolandygyny esasy baha hökmünde görkezdi. Bu wehşilik zäherlenen adamlaryň biriniň aman galyp, hassahana düşmegi we dükanyň eýesiniň etmişiniň üstüniň açylmagy bilen tamamlandy. Obanyň ýaşaýjylary wepat bolan adamlaryň hemmesiniň soňky gezek Jaýswalyň öýünde myhmançylykda bolandygyny anyklap, polisiýa habar berdiler. Häzirki wagtda bu waka boýunça jenaýat işi gozgalyp, giňişleýin derňew alnyp barylýar.