Paýtagtymyzda giň gerimli “Kids EXPO: ähli zat çagalar üçin” halkara sergi-ýarmarka öz işini dowam edýär. Täze okuw ýylynyň öňüsyrasynda guralýan bu çäre indi ajaýyp däbe öwrülip, diňe bir çagalar üçin harytlar we hyzmatlary hödürlemek bilen çäklenmän, bilim ulgamynda tejribe alyşmak üçin-de giň mümkinçilikleri döredýär.

 

Serginiň açylyş dabarasy çagalaryň döredijilik çykyşlary, aýdym-saz bilen bezeldi. Hormatly Prezidentimiziň gatnaşyjylara iberen Gutlagy-da uly üns bilen diňlenildi. Onda çagalaryň şatlygyň we bagtyýarlygyň baş alamaty bolup durýandygy aýratyn nygtaldy.

 

Sergide ýurdumyzdan hem-de daşary ýurtlardan gatnaşyjy 80-den gowrak edara-kärhana öz önümlerini görkezýär. Olaryň hatarynda Birleşen Arap Emirliklerinden, Fransiýadan, Hytaýdan, ABŞ-dan, Russiýadan, Türkiýeden, Özbegistandan wekiller bar. Serginiň diwarlyklarynda çagalar üçin oýnawaçlar, okuw esbaplary, okuw merkezleriniň hyzmatlary, şeýle hem saglygy goraýyş serişdeleri giňden görkezilýär.

 

Arkadag şäherindäki çagalar sagaldyş-dikeldiş merkeziniň mümkinçilikleri, ýurdumyzyň hususy kärhanalarynyň öndürýän önümleri we dünýä belli kompaniýalaryň hyzmatdaşlyk teklipleri myhmanlarda uly gyzyklanma döredýär. Şeýle hem ýerli önüm öndürijiler tarapyndan taýýarlanylýan ýokary hilli azyk önümleri, çaga iýmitleri, arassaçylyk serişdeleri giňden hödürlenýär.

 

Serginiň çäklerinde dürli döredijilik meýdançalary, okuw sapaklary, ussatlyk dersleri, şeýle hem bäsleşikler guralýar. Çagalaryň arasynda emedekleme ýaryşy, çalt ýazmak boýunça bäsleşikler, robot tehnikasy boýunça çäreler uly şowhun bilen geçýär. Şeýlelikde, ýaş nesliň zehin we başarnyklary açylýar, üstünlik gazananlara ýadygärlik sowgatlary gowşurylýar.

 

Kitap ýarmarkalarynda ýaş aýratynlyklara laýyklykda hödürlenýän kitaplar we öwrediji gollanmalar ata-eneleriň hem ünsüni çekýär. Şeýle çäreler çagalaryň okuwa gyzyklanmasyny, döredijilik pikirlenişini ösdürmäge ýardam edýär.

 

Umuman, “Kids EXPO” diňe bir işewürlik hyzmatdaşlygy üçin däl, eýsem, maşgala dynç alyşy, çagalar üçin täze mümkinçilikler bilen tanyşmak, tejribe alyşmak üçin hem möhüm meýdança bolup hyzmat edýär.

 

Bu giň möçberli gözden geçiriliş ýaş nesilleriň bagtyýar geljegini üpjün etmäge gönükdirilen döwlet syýasatynyň aýdyň subutnamasydyr. Sergi 23-nji awgusta çenli dowam eder, ahyrynda gatnaşyjylara diplomlar gowşurylar.