Hökümetiň sanly ulgam arkaly guralan nobatdaky maslahatynda ýurduň energetika pudagynyň kuwwatlylygyny has-da ýokarlandyrmak baradaky meselelere seredildi. Wise-premýer B. Annamämmedow degişli ministrligiň alyp barýan işleri, hususan-da, hereket edýän desgalaryň maddy-enjamlaýyn binýadyny döwrebaplaşdyrmak boýunça amala aşyrylýan çäreler barada hasabat berdi. Häzirki wagtda ýurdumyzyň dürli sebitlerinde ýerleşýän elektrik stansiýalarynda, ýylylyk merkezlerinde we transformator beketlerinde düýpli abatlaýyş hem-de täzelemek işleri utgaşykly dowam etdirilýär.

Bu amala aşyrylýan giň gerimli çäreler içerki sarp edijileri, şol sanda ilaty we önümçilik kärhanalaryny ýokary hilli gije-gündizleýin elektrik energiýasy bilen üpjün etmekde aýratyn orna eýedir. Pudagyň durnukly işlemegini gazanmak we energiýa geçiriji ulgamlaryň tygşytlylygyny ýokarlandyrmak maksady bilen, hökümet wekili tarapyndan döwlet Baştutanynyň garamagyna täze anyk teklipler hödürlenildi.

Türkmenistanyň Prezidenti hasabaty jemlemek bilen, ýurduň energetika garaşsyzlygyny berkitmegiň we bu ugurdaky düzüm birliklerini yzygiderli kämilleşdirmegiň döwlet syasasatynyň ileri tutulýan ugurlarynyň biridigini belledi. Ýolbaşçy hödürlenen taslamalary we meýilnamalary makullap, wise-premýere pudagyň kuwwatyny doly güýjünde ulanmak we elektrik bökdençlikleriniň öňüni almak barada anyk tabşyryklary berdi.

Döwlet Baştutanymyz elektrik geçiriji ulgamlaryň we stansiýalaryň bökdençsiz işlemeginiň üznüksiz üpjünçiligiň özeni bolup durýandygyny aýratyn nygtady. Şunlukda, degişli edaralara tehnikalaryň we enjamlaryň bellenen kadalara laýyklykda bökdençsiz işledilmegine, täze tehnologiýalaryň önümçilige ornaşdyrylmagyna hem-de sarp edijileriň islegleriniň doly kanagatlandyrylmagyna yzygiderli gözegçilik etmek tabşyryldy.