Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkonyň arasynda telefon arkaly söhbetdeşlik boldy. Gahryman Arkadagymyz söhbetdeşligiň dowamynda Russiýanyň parlamentiniň ýokarky palatasynyň ýolbaşçysyny doglan güni bilen öz adyndan hem-de Türkmenistanyň Prezidentiniň adyndan tüýs ýürekden gutlap, oňa berk jan saglyk, egsilmez bagt we döwlet işlerinde täze üstünlikleri arzuw etdi.

Milli Liderimiz Walentina Matwiýenkonyň Türkmenistanda görnükli döwlet işgäri, tejribeli syýasatçy we ýurdumyzyň iň ýakyn dostlarynyň biri hökmünde uly hormatdan peýdalanýandygyny nygtady. Onuň Türkmenistan bilen Russiýanyň arasyndaky dostlukly gatnaşyklary pugtalandyrmaga hem-de ikitaraplaýyn hyzmatdaşlygy täze sepgitlere çykarmaga goşýan şahsy goşandyna ýokary baha berildi.

Söhbetdeşligiň barşynda Walentina Matwiýenkonyň halkara derejesinde parahatçylygy we durnukly ösüşi üpjün etmek, parlamentara gatnaşyklary kämilleşdirmek hem-de ynsanperwer hyzmatdaşlygy ösdürmek ugrundaky işleri bellenilip geçildi. Şeýle hem dünýä syýasatynda we halkara gatnaşyklarynda zenanlaryň eýeleýän ornuny berkitmekde onuň bitirýän hyzmatlaryna aýratyn üns çekildi. Iki ýurduň parlamentleriniň arasyndaky gatnaşyklaryň strategik hyzmatdaşlygyň möhüm bölegi bolup durýandygy tassyklanyldy.

Walentina Matwiýenko hoşniýetli gutlaglar we mähirli sözler üçin tüýs ýürekden minnetdarlyk bildirip, Russiýa bilen Türkmenistanyň arasyndaky özara hormat goýmak däplerine esaslanýan dostlugy has-da ösdürmekde türkmen halkynyň Milli Lideriniň eýeleýän ornunyň örän uludygyny belledi. Taraplar ikitaraplaýyn hyzmatdaşlygyň ähli ugurlar boýunça mundan beýläk-de rowaçlanjakdygyna ynam bildirdiler.