26-njy maýda Nýu-Ýorka amala aşyrylan saparyň çäklerinde Türkmenistanyň daşary işler ministri Raşid Meredow bilen Azerbaýjan Respublikasynyň daşary işler ministri Jeýhun Baýramowyň arasynda duşuşyk geçirildi. Türkmenistanyň DIM-niň habar bermegine görä, gepleşikleriň dowamynda taraplar iki doganlyk ýurduň arasyndaky gatnaşyklaryň häzirki ýagdaýyny we ony dürli ugurlar boýunça täze sepgitlere çykarmagyň mümkinçiliklerini ara alyp maslahatlaşdylar.

Duşuşykda syýasy-diplomatik dialogy pugtalandyrmaga, ýokary we iň ýokary derejedäki saparlary hem-de duşuşyklary işjeňleşdirmäge, şeýle hem ozal gazanylan ylalaşyklary durmuşa geçirmäge aýratyn üns berildi. Ministrler ikitaraplaýyn hyzmatdaşlygyň şertnama-hukuk binýadyny mundan beýläk-de berkitmegiň möhümdigini nygtadylar.

Şeýle hem taraplar halkara we sebit guramalarynyň, ilkinji nobatda bolsa, BMG-niň çäklerinde özara hyzmatdaşlyk meseleleri boýunça pikir alyşdylar we halkara meýdançalarynda iki döwletiň biri-birine berýän ýokary derejeli goldawyna ýokary baha berdiler. Geljekde geçiriljek uly halkara çäreleriniň taýýarlyk meseleleri hem maslahatlaşyldy. Duşuşygyň ahyrynda taraplar Türkmenistanyň we Azerbaýjanyň arasyndaky däp bolan dostlukly, doganlyk we hoşniýetli goňşuçylyk gatnaşyklaryny mundan beýläk-de ösdürmäge ygrarlydyklaryny tassykladylar.